Reportajen Umbelina dos Reis
Sekretáriu Estadu Komunikasaun Sosiál (SEKOMS) relata atinjementu servisu ne’ebé durante ne’e halo liu hosi programa “meet the press” hodi publika informasaun ne’ebé los no kredivel iha sosiedade direita ka liu hosi média sosial sira.
Mericio Juvinal Akara hatete, sidadaun iha direitu atu hatene informasaun ho Kredivel, entaun ita lakohi husik ema barak aproveita espasu públiku atu lansa informasaun hoax ka falsa.
“Estadu ho governu iha dever atu proteje nia sidadaun, entaun ho programa “meet the press,” jornalista sira bele aproveita husu informasaun direita ho los tanba populasaun hein hela informasaun Kredível ne’e, informasaun ne’ebé edukativu no informasaun ne’ebé inspira,” dehan Akara.
Governante ne’e esplika katak, Primeiru Ministru ko’alia bei-beik ona katak enkoraja sidadaun hotu partisipa iha dezenvolvimentu nasaun, tanba ne’e mak ita nia kolaborasaun tenki metin liu tan atu kombate hoax, kombate lia falsu, tane aas informasaun los no kredível iha era dizitalizasaun.
