BTL,E.P Asina Kontratu ho Kompañia 2
Bee Timor-Leste Empreza Públika (BTL, E.P), realiza Seremónia Selebra Kontratu ho montante orsamentu $212,763.01 ba kompañia Sule Bere Rai Kiak Unipesoal Lda, no mos ho montante orsamentu $453,385.77 ba Kompañia ILIE CHAO Unipesoal Lda, kona-bá Projetu Konstrusaun Fornesimentu Sistema Bee-Moos ba Postu-Administrativu Laga, Munisípiu Baucau no Postu-Administravu Luro, Munisípiu Lautein.
Hafoin remata enkontru, Prezidente BTL,E.P Carlos Peloi dos Reis hateten ohin sira asina kontratu ho kompañia Sule Bere Rai Kiak Unipesoal Lda no Komapañia ILIE CHAO Unipesoal Lda, hodi reabilita sistema bee-moos ba Komunidade iha Munisipiu Baucau, Postu-Administrativu Laga no Komunidade Munisipiu Lautenu, Postu-Administrativu Luro ne’ebe mak durante ne’e seidauk asesu ba bee-moos.
“Orsamentu ne’ebe ami aloka atu halo reabilitasaun Sistema bee-moos ba parte Postu-Administrativu Laga Munisipiu Baucau ho orsamnetu montante $212,763.01 no ba Postu-Administrativu Luro Munisipiu Lauteinu, ho orsamnetu montante $453,385.77, hodi halo servisu meloramentu sistema Bee-Moos ba komunidade sira iha fatin refere” dehan, Prezidente BTL,E.P Carlos Peloi dos Reis ba Jornalista iha Salaun Enkontru BTL Caicoli, 27/04.
Nia espera katak, wainhira projétu ne’e remata komunidade husi Postu-Administrativu Luro hamutuk Uma Kain 242 no Populasaun hamutuk 1.902 no mos Komunidade husi Postu-Administrativu Laga hamutuk uma kain 294 no populasaun hamutuk 1.764 ne’ebe mak seidauk asesu ba Bee Moos, espera Kompañia rua ne’e bele implementa servisu ho kualidade, tuir tempu kontratu ne’ebe iha atu nune’e komunidade sira bele asesu ba bee-moos.
“Bee Timor-Leste Empreza Públika (BTL,E.P), sei esforsu atu promove nafatin projétu ba Postu-Administrativu sira liu-liu iha área rurais sira, atu halo oinsá bele lori Bee Saniamentu ba komunidade sira, tanba ita akompaña katak komunidade barak mak sei nafatin halerik ba bee-moos,” nia tenik.
Iha fatin hanesan Reprezentante Autoridade Administradór Postu-Administrativu Luro Munisipiu Lautem Alfredo Ximenes haktuir, nu’udar Autoridade Lokál agradese ba BTL,E.P tanba kuaze tinan 10 komunidade Postu-Administrativu Luro preokupa tebes ba bee-moos, i proposta ne’e sira hato’o kuaze dala Sanulu (10), maibé laiha resposta hafoin tinan ida ne’e mak iha resposta, tanba ne’e nia reprezenta povu luro asina kontratu ida ne’e hodi bele fornese bee-moos ba komunidade sira.
“Tuir ami nia haree katak bee matan ne’e kuandu dada mai iha Postu Luro Vila Komunidade barak mak sei asesu ba Bee-Moos, liu-liu edifisiu públiku hanesan Eskola, Igreja, Sentru Saúde sira ne’ebe eziste iha Luro vila sei asesu, tanba ne’e ami husu nafatin ba BTL,E.P ba oin nafatin se bele tau matan nafatin ba ami nia komunidade sira ne’ebe mak durante ne’e sei asesu ba bee-moos iha Postu refere,” Dehan nia.
Iha parte seluk, Administradór Postu-Administrativu Laga Munisipiu Baucau Domingos Loiola J. Pereirra Informa, Komunidade Suku Soba Postu-Administrativu Laga Munisipiu Baucau Hamutuk uma kain 294 no populasaun hamutuk 1.764 susar atu asesu ba bee-moos tanba dook husi bee matan, i nune’e karik liu-husi kontratu BTL,E.P ho kompañia sira ne’e bele ajuda komunidade sira hodi bele asesu ba bee-moos.
