Reportajen David da Costa Gusmao
Prezidente Repúblika, Dr. Jose Manuel Ramos Horta dehan joven sira ne’e presiza sai nu’udar sentru vizaun ba iha progresu no modernizasaun.
Nia haktuir edukasaun no saude prioridade nasionál inkontornável rua ne’ebé merese haree ninia importansia estratéjika, ne’ebé reflete iha Orsamentu Jerál Estadu (OJE) no iha kualidade hosi responsavel sektór.
“Ita nu’udar nasaun ida ne’ebé ho populasaun joven barak tebes, no ita nia joven sira presiza sai nu’udar sentru ba ita nia vizaun iha progresu no modernizasaun,” Prezidente da Republika atual Ramos Horta dehan bainhira halo nia Diskursu iha serimonia tomada de pose iha tasi tolu, Sexta 19/05.
Atual Prezidente ne’e hateten bainhira nia servisu hamutuk ho lideransa, Governu no sosiedade sira atu tau prosperidade nasional ba mehi joven sira nian iha fatin primeiru no tau iha fuan.
“Wainhira ha’u servisu hamutuk ho ita – nia líder sira hosi setor sira hotu governu no sosiedade nian , atu aborda kona – ba prioridade nasionál sira , ha’u sei husu ba sira atu kontinua mantein nesesidade sira no mehi ita-nia joven sira nian iha fatin dahuluk iha ita – nia hanoin no mantein sira metin iha ita-nia fuan,” nia dehan.
Nia salienta joven sira nia aspirasaun maka tenke orienta implementasaun ba prioriedade urjente hirak ne’e.
“Liuhosi ita nia investimentu ba ita nia joven sira , futuru Timor – Leste , ne’ebé ita bele garante dezenvolvimentu , estabilidade no unidade iha ita nia Nasaun ba ita nia komunidade sira tomak,” nia hateten.