Reportajen Davida da Costa Gusmao
Prezidente Repúblika, Dr.José Manuel Ramos Horta, promete iha nia mandatu sei loké jardin prezidensial pertense ba labarik iha Palásiu Prezidensiál Nicolau Lobato Aitarak-Laran Bairru Pite, nune’e mós tau Internet iha Jardim refere atu joven sira bele asesu.
“Sei loké jardin prezidensiál pertense ba labarik iha Palásiu Prezidensiál Nicolau Lobato, Bairru Pite ida ne’e, inklui tau Internet iha Jardim refere atu joven sira bele asesu, tanba Jardim iha luan hanesan ne’e ha’u labele mesak iha ne’e” Dehan PR Ramos Horta iha nia diskursu, iha Palásiu Prezidensiál Nicolau Lobato Aitarak Laran, Bairru Pite, Sesta 20/05
Nune’e mós Xefe Estadu ne’e afirma, sei promove igualidade jéneru 50% entre feto no mane iha palásiu prezidensiál, kria departamentu ba sosiedade sivíl kona-ba defisiénsia, komunidade Lesbian Gays Bisexuals Intersexual (LGBTI) haree sira hanesan no kontinua programa sosiál ne’ebé prezidensiál halo ona.
Aleinde ne’e mós, nia konpromete, durante mandatu sei buka diálogu lidér nasionál hotu, Parlamentu Nasionál, sosiedade sivíl, akademiku no oinsá hametin parseiru ho igreja hodi lori dezenvolvimentu nasaun ba oin, oinsá haree prioridade sira seluk hanesan edukasaun, saúde agrikultura, serguransa alimentár, kombate malnutrisaun, tranzisaun jerasionál, haree dezenvolvimentu hosi Oé-Cusse to’o ba Covalima.
Enkuantu remata isár bandeira nasionál ba komemorasaun loron restaurasaun indepedensia ba dala-20. Xefe estadu ne’e kontinua konvida labarik sira ne’ebé akompaña serimónia ne’e, atu ba kumprimenta Prezidente Repúblika Portugál.
“Ha’u konvida labarik ki’ik sira iha ne’e atu mai iha oin hodi fó kumprimenta ba Prezidente Repúblika Portugál, Marcelo Rebelo no Governadór Jerál Austrália,” PR Ramos bolu labarik sira.
Nune’e Labarik lubun ne’ebé ho idade 13 mai kraik la’o ho forma hakat kedas ba iha fatin podiun VIP nian ho oin hamnasa no ksolok, hodi kumprimenta direta PR foun, Prezidente Portugál no Governadór-Jerál Austrália.
Bainhira labarik sira kumprimenta hotu, kontinua ba hamutuk ho Prezidente Republika Ramos Horta, ho Prezidente Portugál, Governadór-Jerál Austrália no VIP sira seluk ba ba han hamutuk.
