Reportajen Santina Lucia da Costa
Edwar Ong nu’udar nain ba Pelican Paridise hasoru malu ho Prezidente Repúblika, Dr. José Ramos Horta koalia kona-ba konstrusaun apartment no hotel, ne’ebé sei hahú iha Novembru 2022.
Hafoin enkontru, Na’in ba Empreza Pelican Paradise, Edwar Ong, informa, Investimentu Pelican Paradise ba faze dahuluk ba dezeñu foun sei gasta orsamentu $100 milliaun, no kustu investimentu loloos ho totál $400 milliaun hodi konstrui apartementu ida no hotel boot ida ho kapasidade kuartu 1000.
Durante prosesu tomak la’o, Empreza ne’e sei nafatin iha Timor-Leste, projetu Pelican Paradise tinan barak ona, no dezde uluk kedan to’o agora Prezidente Repúblika, José Ramos-Horta sempre fó korajen atu empreza ne’e nafatin pasiénsia hodi hein prosesu sira no aban bainrua governu sei fó suporta ba dezenvolvimentu ne’e.
“Hau primeiru hasoru ho Prezidente Republika, Dr. José Ramos Horta iha tinan 2008, agora hau hasoru nia dala ida tan, ami uluk kedas mai Timor-Leste asina projetu kona-ba pelican paradise, iha tinan 2008 bainhira Horta Prezidente Republika, ami nafatin iha Timor-leste projetu Pelican paradise tinan barak ona, tanba Prezidente Republika uluk to’o agora fó korajen katak, ita pasiensia atu bele kontinua serbisu ba obra ne’ebé desde tinan 13 liuba mehi ona atu halo iha Timor-Leste.” Hateten, Na’in ba Empreza Pelican Paradise, Edwar Ong ba Jornalista sira iha Palasiu Prezidensial Nicolau Lobato, Bairu-Pite, 25/5.
Na’in ba Empreza Pelican Paradise dehan empreza ne’e la’os mai Timor-Leste halo hotel hanesan baibain, maibé atu halo hotel ho investimentu ne’ebé espesiál iha mundu, para dada ema mai nasaun seluk mai vizita.
Ba faze primeiru Empreza ne’e sei fó serbisu ba ema hamutuk 1200 direita, ho nia filojofia sempre fó prioridade ba ema lokal, tanba sira haree joven sira iha Timor-Leste iha enerjia atu serbisu, no aprende foun barak.
“Tempu naruk ami hein atu komesa projetu ne’e tanba liu prosesu ho governu ami sempre ezize ba parte relevante tanba mós mosu pandemia COVID-19 ami mós hola desizaun atu halo dezeñu foun ba projetu ne’e komesa tinan 2021 atu bele adapta ho situasaun mundu ohin loron nian.” Hateten, Edwar Ong.
Edwar Ong, mós agradese ba VIII Governu konstituisionál lideradu Primeiru Ministru, Taur Matan Ruak no Ministru Prezidensia Konsellu Ministru, Fidelis Leite Magalhães tanba sira aselera prosesu to’o asina akordu espesiál investimentu iha loron 3 Janeiru 2022.
Hafoin asina akordu Pelican Paradise aselera prosesu hotu-hotu no garante katak iha fulan Juñu tinan ne’e, dezeñu sira sei remata no iha fulan Novembru Pelican Paradise bele ona hahú serbisu konstrusaun sira atu bele aselera prosesu hotu tuir espetativa ne’ebé empreza iha
“Komesa iha loron 3 Janeiru 2022 ami aselera prosesu hotu-hotu tanba akordu espesial asina ona, para fulan Juñu ne’e prosesu desing hotu ona. No Serbisu konstrusaun bele hahú iha fulan Novembru 2022.” Haktuir, Edwar Ong.
Na’in ba Empreza Pelican Paradise, afirma tan katak, Prezidente Republika Horta ho Xanana Gusmão ba ona hotel hotu iha Malasia sira komprende kona-ba projetu ne’e. sira mós sempre fó korajen bele lansa hotel hanesan ne’e bele hamriik iha Timor-Leste.
Nia realsa tan katak, Planu investimentu kleur tanba problema iha administrasaun, to’o iha loron 3 Janeiru 2022 foin asina akordu investimentu espesial entre Governu ho Pelican Paradise. Agora prosesu hotu la’o di’ak ona, hein halo konstrusaun ba tinan ne’e.
Nia hatutan, Alende prosesu administrasaun ne’ebé han tempu naruk no seluk mak tanba projetu ne’e boot tebes tanba ne’e presiza dunik tempu atu tetu buat hotu ho di’ak husi Governu liuliu iha aspetu sira liga ho lisensamentu ambientál, rai no sira seluk maibé oras ne’e prosesu hotu remata ona no parte Pelican Paradise prontu ona atu hahu konstrusaun iha tinan ne’e.
Edwar Ong, Haktuir, Prezidente Republika Dr. José Ramos Horta fó korajen katak, keta rende, halo tuir prosesu no Horta husu serbisu lalais para projetu ne’e bele hotu iha tempu badak ne’e.