Reportajen estajiadu UNTL, Joselina dos Santos
Responsabilidade Professional Postu Saúde Tasi-Tolu, husu ba parte relevante liu-liu ba Ministériu Saúde (MS) tau matan ba problema hirak ne’ebé sira enfrenta hanesan rekursu umanus, ekipamentus, fasilidade hanesan bee-moos no hariis fatin, tanba dala barak ona sira hato’o preokupasaun hirak ne’e, maibé to’o ohin loron seidauk iha resposta.
Responsabilidade Postu Saúde Tasi-Tolu Agustina Correia Belo ba Neon Metin hateten, postu refere iha pessoal saúde permanente hamutuk na’in 6, médiku 2, parteira 1 enfermeira 1, farmásista 1 inklui dentista 1, iha mos kontratadu na’in 3 no voluntariu na’in 3, maibé susar atu halo distansia malu tanba fatin klo’ot.
“Postu Saúde Tasi-Tolu kobre iha aldeia rua mak hanesan aldeia 12 de Outubru parte suku Comoro, no aldeia Terra Santa parte suku Madohi nian, pasiente ne’ebé mai konsulta iha ne’e, kada loron atus ida resin inklui inan isin rua inan fó susu no mós planementu familiar no vasinasaun,” dehan, Profesionál Saúde Agustina Correia Belo ba Neon Metin iha kna’ar fatin Postu Saúde Tasi-Tolu, 24/05.
Nia dehan pasiente hirak ne’ebé mai konsulta sira atende ho di’ak to’o hotu, maibé difikuldade boot ba sira mak kondisaun fatin la permite atu atende pasiente sira, no mos postu saúde ne’e iha kuartu ida maibé kobre ba inan isin rua vasina inklui planeamentu familiar hamutuk ho kuartu ida entaun susar ba sira hodi fó tratamentu ne’ebé di’ak ba pasiente sira.
“Rekursu la to’o ,fatin la favoravel ba pasiente sira, maibé ne’e ami nia serbisu hakarak ka lakohi tenke hala’o to’o hotu, ami ko’alia mós hanesan de’it, tanba Ministra Saúde rasik tun direita hodi halo observasaun ba kondisaun postu saúde nian, maibe até ohin loron nunka iha mudansa,” dehan nia.
Nune’e nia husu ba governu tau matan netik ba postu saúde refere, nune’e bele atende pasiente sira ho dignu, pelumenus mai hadi’a kondisaun saúde, wainhira pasiente sira mai konsulta hakarak ka lakoi tenke sena malu balun to’o moras aumenta tanba fatin klo’ot la fó distánsia ba malu.
