Reportajen Santina Lucia da Costa
Diretór Ezekutivu Asosiasaun Halibur Defisiénsia Matan iha Timor-Leste (AHDMTL), Gaspar Afonsu ho nia ekipa hasoru Prezidente Repúblika, Dr. José Manuel Ramos Horta hodi kumprimenta, no Gaspar sei hala’o knaar iha Palasiu Prezidensiál hahú husi loron 1 Juñu 2022 hanesan asesór prinsipál ba asuntu sosiál ba tinan lima.
Hafoin enkontru, Diretór Ezekutivu AHDMTL, Gaspar Afonsu, hateten, Husi tinan 2002 Restaurasaun Independensia to’o mai agora, orgaun soberania primeira vez envolve Ema ho Difisiensia direita, atu fó kontribuisaun hodi dezenvolve ba rai ida ne’e.
“Hau lori hau nia membru sira mai hato’o komprimenta parabens ba Prezidente Republika. Segundu hau sei mai ativu iha ne’e iha loron 1 Juñu 2022 hanesan asesor principal ba Prezidente Republika ida ne’e primeira mandatu Dr. Ramos Horta nian, ne’e mak artigo 21 foin vale mak ne’e.” Informa, Diretór Ezekutivu AHDMTL ba Jornalista sira iha Palasiu Prezidensial Nicolau Lobato, Bairu-Pite, 30/5.
Diretór Ezekutivu AHDMTL, afirma, Bazeia ba artigo 16 Konstituisaun RDTL, Alinea 2 la haree ba rasa, etniku, fiziku, mental maki da ne’e, la’os ba koalia de’it apoiu karidade de’it, tanba ema ho difisiensia ne’e, ema iha kapasidade, abilidade, soké laiha oportunidade ne’e mak labele halo buat ida ne’e.
Gapar Afonso akresenta, Maske tinan lima mai la halo buat ida, maibé buat ruma husi Palasiu Prezidensial bele interven direita ba asuntu ema ho difisiensia, no mós ba vulneravél sira seluk, tanba ita boot sira hatene katak, asuntu ema ho difisiensia ne’e komún, asuntu LGBTI no komunidade sira seluk.
“Ba oin media sira hasoru hau karik la’os diretór on aba AHMDTL, maibé sei mai hamutuk ho Prezidente Republika, DR. Ramos Horta durante tinan lima sai asesór prinsipal ba asuntu sosiáis.” Tenik, Gaspar Afonso.
Gaspar Afonso senti orgullu tanba Prezidente Republika, Horta ema ida ké koñesidu iha mundu, iha nia diskursu dehan, hau sei lori ita nia alin difisiensia sira matan ida ne’ebé koñesidu iha Timor-Leste.
“Afinal Prezidente mós durante ne’e akompaña hau nia luta ba ema ho difisiensia. Ne’ebé orgullu no agradese, maske eskola seidauk hotu, Prezidente Republika bolu ona mai asesór, ne’e la’os tanba hau nia matenek maibé tan Ema ho Difisiensia sira, 38.118 sira nia lian maka hau mai ne’e.” hatutan Gaspar.
Nia mós fó agradese ba maromak tanba maromak bele fó oportunidade, atu serbisu iha primeriu orgaun soberania iha ita nia rain, ne’e orgullu tebes, ida ne’e pasu primeiru atu bele hakat iha palku politika, hodi kontribui dezenvolve rai ida ne’e, rai ida ne’e presija ema hotu-hotu nia kontribuisaun, tantu ema ho difisiensia no ema la ho difisiensia.
Nia realsa tan katak, Futuru AHMDTL nian, Diretór interinu AHMDTL, Gabriel Fonsianio de Souza mak sei asumi interinu tranzitóriu durante tinan ida, hahú husi loron 1 Juñu 2022 to’o 1 Juñu 2023.
Diretór AHDMTL, haktuir, Prezidente Republika, Ramos Horta dehan, sei halo buat ruma ba AHMDTL, no nia mós fó bemvidu ba Gaspar ho nia ekipa iha loron 1 Juñu komesa mai hahú ativu iha Palasiu Prezidensial hanesan asesór Prinsipal ba Prezidente Republika durante tinan lima.
“Hau ho kolega feto ida difisiensia matan hotu no personal asisten na’in rua mai akompaña na’in rua, ami na’in haat mak mai.” Dehan, Gaspar.
Membru difisiensia matan iha AHMDTL hamutuk 245. Agora dadaun ativu ne’e 90, mane 45 feto 45 mak iha AHMDTL.