Reportajen Santina Lucia da Costa
Diretór Ezekutivu Centro Nasionál Chega! (CNC), Hugo Fernandes hateten CNC dezenvolve ona fatin turizmu istóriku iha munisípiu 9 hanesan Dili, Ermera, Aileu, Ainaru, Baukau, Manatuto, Viqueque, Lospalos hotu ona no sei dezenvolve mais 28 sitiu istóriku mak identifikadu.
Diretór Ezekutivu CNC, Hugo Fernandes hateten asuntu ne’e hafoin hala’o enkontru ho Prezidente Repúblika, Dr. Jose Manuel Ramos Horta koalia kona-ba progresu no atinjimentu sira CNC nian, aprezenta programa CNC, no husu apoiu ba Xefe Estadu apoiu ba oin nian, no oinsa apoiu ba labarik lakon ne’ebé atu lori hikas mai Timor.
“Ha’u hanoin ba fatin turizmu ita hahú mapamentu ita halo iha Munisípiu 9 hotu ona, agora iha Dili ita sei dezenvolve ita iha mais 28 sitiu istóriku mak idenfikadu, maibé ita iha fulan oin se buat hotu-hotu la’o di’ak ita sei implementa uluk programa ida ita bolu Chega Tour ba fatin 15 ne’ebé vizitante, estudante, públiku, turista sira bele ba iha Centru Chega depois ami fasilita viajen ba sitiu istóriku 15 iha Dili”, Dehan Diretór Ezekutivu CNC, Hugo Fernandes ba jornalista sira iha Palasiu Prezidensiál Bairu-Pite, 30/05.
Hugo Fernandes informa, munisípiu 9 mak hanesan Dili, Ermera, Aileu, Ainaru, Baukau, Manatuto, Vikeke, Lospalos no fatin 15 iha Dili ne’e mak Kaza Europa, Tasi Tolu, Santa Kruz, Palasiu Nobre Lahane, Marabia, abrigu Kakaulidu, Pusat Wilaya Indonézia.
Iha fatin hanesan Prezidente Konsellu Administrasaun CNC, Alzira Sequeira Freitas Dos Reis informa, objetivu enkontru Prezidente Repúblika ne’e hakarak kongratula Xefe Estadu, alende ne’e mós aprejenta kona-ba programa no progressu no atinjimentu ne’ebé iha ona.
“Ami aprezenta kona-ba programa Centru Nasionál Chega (CNC) nian no progessu sira, no atinjimentu sira ne’ebé iha ona, husi ne’eba ami husu apoiu ba Xefe Estadu atu bele apoiu sira ba oin, Nune’e mós ko’alia uituan kona-ba oinsá apoiu ba iha labarik lakon ne’ebé atu lori hikas mai Timor.” Hateten, Prezidente Konsellu Administrasaun CNC, Alzira Sequeira Freitas dos Reis.
Alzira akresenta implementasaun, rekomendasaun husi CAVR no CVA nian ne’ebé iha ninia atinjimentu ne’ebé halo ona, haree mós progresu sira, liu-liu oinsá programa sira ne’e implementasaun.
Nia hatutan, programa sira ne’e inklui halo sosializasaun, dezaminasaun kona-ba rekomendasaun relatóriu rua ne’e rasik oinsá halo advokasia, atu bele integra iha polítika no planu asaun Ministériu relevante no mós organizasaun sira ne’ebé CNC nia parseiru interesadu sira nian.
Iha mós oinsá CNC nia apoiu sobrevivente sira ne’ebé halo ona no mós mapamentu ba fatin istóriku sira iha rain laran.
Entretantu Alzira Segqueira haktuir, iha enkontru ne’e Prezidente Repúblika, José Ramos Horta iha komitmentu hakarak harii pas no rekonsiliasaun, tanba ne’e Xefe Estadu apoiu tebes serbisu ida ne’e no komitmentu hakarak apoiu ba CNC nian.
