Reportajen David Da Costa
Asosiasaun Jornalista Timor Lorosa’e (AJTL) liuhusi ninia membru jornalista sira ne’ebé maka hala’o media Tour iha Ermera halo asaun karidade ba Inan ferik ne’ebé maka hetan Defisénsia fisiku durante tinan naruk ona iha deit nian toba fatin, iha aldeia Palimanu, Suku Fatuquero postu Administrativu Railaku, no Munisípiu Ermera. Tanba ne’e AJTL kontinua motiva nian membru sira atu sai fatin sadere ba ema lian laek sira.
Koordenadór Media Tour husi Asosiasaun Jornalista Timor Lorosa’e (AJTL) ho Oxfam iha Timor-Leste, Constancio Vieira hateten, ohin Asosiasaun Jornalista Timor Lorosa’e (AJTL), hala’o asaun karitativa ida iha Gleno, ba inan ferik ida ne’ebe maka defisiénsia, entaun nian labele la’o hodi halo atividade lorloron nian. Tanba ne’e jornalista halo apoiu umanitária, jornalista la’os halo advokasia de’it, pelemenus asaun kiik oan ne’ebé maka jornalista sira bele halo.
No apoiu hiral ne’e jornalista sira nian ideia rasik, bainhira sira mai vizita ema ho defisiénsia, sira iha hanoin katak tenke halo buat ruma, hodi bele apoiu ema ho defisiénsia, tanba jornalista sira hatene sira nian realidade ida ne’ebé maka iha.
“Ohin buat kiik oan ne’ebé mak ami lori, ita nia oan jornalista sira mak iha inisiativa hodi hakarak lori mai, labele haree ba iha nia kuantidadade barak ka uituan, maibé haree ba ami nia domin. Ita la’os utiliza ita nia lapijeira tutun hodi hamamar ema nian fuan, maibé ita rasik uza saida maka ita bele iha. Tanba buat kikoan ne’ebé ita halo, la’os haree husi nian kuantidade, maibé ida ne’e ita haree husi ita nia fuan hun ne’ebé maka ita bele fó,” Dehan Koordenadór Media Tour Scos Vieira, ba Jornalista sira iha Inan Defisénsia nian uma iha Palimanu suku Fatuquero Postu Administrativu Railaku, Sexta 19/04.
Nune’e mós, nia enkoraja ba inan defisénsia ho familia sira, atu iha forsa nafatin hodi hasoru laloran ne’e, tanba moris ema ida rasik maka tenek esforsu hodi hasoru laloran ne’e. Jornalista sai hanesan sadere fatin ba ema lian laek sira deit, maske mai ho lalais deit.
“Ami sai ita boot nia sadere fatin maske lalais deit. lalika hanoin barak, ita hakrak kontente, kontente deit, ita hakrak tanis tanis deit. ita hakrak hirus, hirus deit, so ida ne’e maka kompleta ita nia moris. Forsa nafatin hodi hasoru laloran ne’e, tanba bero moris ita maka hehan rasik to’o maromak fo kbiit nafatin ba ita. Ami Laos moris iha Gleno, maibé ami iha ne’e, ami nian fuan iha Gleno,” nia esplika.
Enkuantu jornalista sira ne’ebé maka haman-an iha Asosiasaun Jornalista Timor Lorosa’e (AJTL) tenke iha fuan boot nafatin, no mantein nafatin ho sira ne’ebé maka kbiit laek, sai lian ba sira lian laek jornalista tenke sai sira nian sadere fatin, iha ne’ebé de’it.
Iha fatin hanesan, Roberto De Deus nu’udar laen husi Inan Defisiénsia fíziku, Filomena Soares, agradese ba Maromak tanba domin husi jornalista sira mai to’o iha fatin ida ne’e hodi haree rasik kondisaun moris familia ida ne’e nian. Maske hala’o hela nia programa maibé ho fuan ne’ebé boot tebes, hodi mai to’o iha fatin ida ne’e hodi haree rasik ho matan tanba ema ne’e ho Difisiénsia fisiku duni.
“Agradese ba Maromak tanba domin husi maun jornalista sira, maske hala’o hela nia programa maibé ho fuan ne’ebé boot tebes, hodi mai to’o iha ami nia fatin ida ijoladu hanesan ne’e, hodi haree rasik ema ho disifisiénsia ne’ebé maka hader ladiak, maibé ho nian esforsu an rasik nia bele hader hodi tur. maibé maun sira iha fuan boot duni, maske mai husi fatin dodok maibe mai to’o iha ne’e minitu ida ka rua hodi hamutuk ema ho defisiénsia atu hamaluk ami,“nia agradese.
Nia mos dehan, sei reza nafatin “ba ita boot sira, halo nafatin ita boot sira nian servisu ho diak no susesu nafatin, atu lori nafatin ita nian rain ida ne’e ba iha futuru ne’ebé diak liu tan,”
Diretor Timor-Leste Organic Fertilzer (TILOFE) Zaquiel Martins, hateten, sente kontente tebes servisu hamutuk ho AJTL no Oxfam iha Timor-Leste, Tanba AJTL hili ona TILOFE, EAMO, FJDE, ne’ebé maka durante ne’e servisu besik liu ba iha komunidade iha Ermera, no sai hanesan mata dalan ba jornalista sira oinsa maka lori sira atu bele deskobre problema sosial sira ne’ebé maka akontese iha Munisípiu Ermera.
Problema sosial ne’ebé mak jornalista sira atu foti maka liga ba iha agrikultura, Turízmu, ekonomia nomós problema sosial, Iha suku Fatuquero ho prezensa jornalista konsegue deskobre problema ema ho defisiénsia, sira balun apoiu husi Governu maibé ladun másimu no balun apoiu husi Organizasaun maibé seidauk másimu, entaun prezensa jornalista sira bele lori tan sira nian lian ba iha autoridade relevantes sira.
“Para ema ho defisiénsia labele sai deit projeitu iha momentu balun, politiku sira labele halo sira hanesna temporariu deit, maibé ema ho defisiénsia no LGBT sira, ema ne’e sai planu premanente ne’ebé maka governu iha dever atu tau atensau ba iha ne’ebá,“nia dehan.
