Reportajen Santina Lucia da Costa
Prezidente Repúblika, Dr. José Ramos Horta kondekora atleta na’in 4 ho Treinadór na’in 3 ne’ebe oferese medalla ba Timor-Leste iha eventu SEA Games bad ala-XXXI iha Vietnam.
Bazeia ba artigu 85 Konstituisaun RDTL alinea J, konjuga numeru 5 husi artigo 2 dekretu lei numeru 15/2009, Prezidente Republika, Ramos Horta kondekora atleta hirak tuir mai ho medalla meritu hanesan, atleta Delio Anzaqeci Mouzinho husi medalla Boxing ne’ebé hetan medalla osan mutin. José B.Q. da Silva husi modalidade Boxing ne’ebe hetan medalla osan metan.
Felisberto de Deus husi Modalidade Atletizmu ne’ebé hetan medalla osan mutin rua. Santina A. De S. Fernandes husi Modalidae Taekwondo ne’ebe hetan medalla osan metan.
Prezidente Republika mos kondekora Treinador na’in tolu husi modalidade Boxing, Gil dos Santos Isaac. Modalidade atletizmu Odete Belo no Taekwondo ho nasionalidade Korea Ki Tae Kim.
Prezidente Republika, Jose Ramos Horta liuhusi nia diskursu hateten atividade desportiva, kultural no literária kontribui hametin dame iha rai ida nian laran, iha nasaun barak maka Governu sempre buka lori desportu para halo atividade ne’ebe kontribui ba orgullu nasional no dame iha rai nia laran.
Prezidensia hakarak kontinua mezmu espiritu no halo barak liu tan, la’ós iha Dili maibé iha foho munisípiu sira, parte ajenda atu hametin dame, haklean dame no halo promosaun ba Timor iha mundu.
“Ita boot sira la’ós de’it atleta, maibé ita boot sira embaixadór boa vontade ba nasaun nian ne’ebé imi haree rai sira hanesan Amérika, Xina, Rússia, Alemaña, Franca, Australia sira halo investimentu maka’as ba sira nia Desportu.” Hateten, Prezidente Repúblika, José Ramos Horta iha ámbitu kondekorasaun ba atleta na’in haat inkluidu treinadór na’in tolu iha Salaun Xina, Palasiu Prezidensial Nicolau Lobato, Bairu-Pite, 30/5.
Xefe Estadu dehan desportu tenke iha mós disiplina, sivilidade, rai ida bele la manán buat ida, maibé bainhira atleta, organizasaun serbisu didi’ak, komportamentu di’ak halo diplomásia ema hotu-hotu kontente.
“Imi fila mai Timor husi naran di’ak Timor iha sea games lori medalla, premiu ne’ebé governu halo tiha ona rekoñesimentu ba ita boot sira. Ba oin ha’u sei ko’alia ho Federasaun sira atu haree oinsá bele ajuda, uluk iha Prezidensia lori atleta balun ba to’o Nova York sei buka halo nafatin atleta sira ne’e ho kobertura internasionál.” Dehan, Ramos Horta.
Horta hatutan la’ós de’it internasionál maibé sei buka aumenta atividade desportiva iha eskola sira, joven no labarik sira iha eskola iha fatin hotu-hotu tenke lori atividade sira ne’e ba to’o suku, dala ruma sira izoladu tebe-tebes atividade ne’eba laiha. Purtantu parabens ba atleta sira, no parabens ba treinadór ho federasaun sira.
Iha fatin hanesan Vise Prezidente Komisaun Olimpiku Nasional Timor-Leste, (CONTL), Mateus da Cruz hatete, pela primeiravez mak atleta sira hetan kondekorasaun nu’udar rekoñesimetu husi estadu orgullu boot tebe-tebes ba desportiva tomak ne’ebé agora daudauk iha Timor laran tomak delegasaun bele ba partisipa SEA Games.
“Ita lakonsege konkista osan mean maibé rekoñesimentu ida ne’ebé aas tebe-tebes ba delegasaun Timor Leste ninian ba SEA GAMES ami sente orgullu tebes-tebes ho kondekorasaun ne’ebé ohin Xefe Estadu atribui ba atleta ho treinadór sira.” Dehan, Mateus da Cruz.
Vise-Prezidente CONTL, hatutan, kona-ba modalidade ne’e ko’alia kona-ba prestasaun tanba ida ne’e mak federasaun hotu-hotu tenke book an atu partisipasaun di’ak hodi hetan rekoñesimetu estadu nian. Ita hatene situasaun ida ne’ebé Timor-Leste ninia fasilidade ba desportu ne’e seidauk kompletu, di’ak maibé ho kondisaun ne’ebé ki’ik, atleta sira utiliza ladun kompletu maibé sira konsege hanorin Timor Leste nia naran iha jogu Sudeste Aziatiku SEA Games.
Iha sorin seluk, Atleta Felisberto de Deus ho modalidade atletizmu hateten, hanesan Timoroan sente orgullu reprezenta rai-lulik Timor-Leste iha mundu internasionál liuhusi talentu ne’ebé iha aprejenta iha jogu SEA Games.
“Ha’u sai koñesidu iha Vietname hau hiit mós sira nia Bandeira hasa’e mós ita nia Bandeira. Tanba ne’e ohin simu kondekora husi Prezidente Repúblika agradese ba Xefe Estadu Ramos Horta ninia, ba ukun tinan lima ba oin ne’e espera katak bele tau kondisaun di’ak mai ami no nafatin hatudu talentu ne’ebé ami iha labele para iha ne’e de’it maibé esforsu an hatudu di’ak liu no hanorin di’ak liu tan rai doben ida ne’e iha eventu internasionál.” akresensta, Atleta modalidae atletizmu, Felisberto de Deus.
Atleta Taekwondo, Santina A. de S. Fernandes Agradese mos ba treainador, familia no federasaun inklui povu Timor-Leste nia apoiu iha jogu Sea Games Vietnam.
Nia dehan kondekorasaun nebe Xefe Estadu atribui ba sira hanesan motivasaun ida tau nafatin halo esforsu hodi hamorin Timor-Leste nia naran iha jogu internasional sira ne’ebe sei tuir mai.
