Reportajen David da Costa Gusmao
Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno dehan, Ministru Negósiu Estranjeiru Xina (MNGX) Wan Yi, sei hala’o vizita ofisiál mai Timor-Leste iha loron 13 Juñu tinan ida ne’e, no iha nia vizita ne’e, parte governu rua sei selebra asina akordu haat.
“Ha’u mai briefing Primeiru Ministru no relata progresu preparasaun vizita Ministru Negósiu Estranjeiru Xina, ne’ebé sei mai vizita Timor-Leste, Ha’u relata ba PM akordu saida mak ita atu asina, tanba PM tenke hatene uluk molok simu Ministru ne’e,” Ministra hateten ba jornalista sira hafoin hala’o enkontru ho PM Taur Matan Ruak, iha Farol, segunda 30/05.
Nune’e akordu ne’ebé Timor-Leste hakarak asina ho Governu Xina maka hanesan akordu servisu area ekonomiku apoia Rádiu Televizaun Timor-Leste , Empreza Públika (RTTL ,E.P), no mós apoia médiku espesialista mai Timór-Leste.
“Akordu ida maka ita hakarak asina maka iha servisu aéreu, iha asuntu akordu Ekonomia, iha kooperasaun hanesan iha area agrikultura no bee moos, apoiu mos ba Radiu Televizaun, i depois iha mos akordu sira atu haruka sira nia medika mai Timor, no akordu balun ne’ebe ami sei diskute hela, kuandu iha ona konkordánsia ami sei hato’o,” nia hatete.
Entretantu Ministru Negósiu Estranjeiru Xina ne’e sei mai vizita Timor-Leste durante oras 24 (loron ida), ne’ebé sei aproveita mós hasoru Prezidente Repúblika ( PR ), Dr. José Ramos Horta, Ministra Negósiu Estranjeiru no Kooperasaun, Primeiru Ministru no entidade importante sira seluk.