Reportajen estudante estajiadu UNTL, Joanina Casemiro
Eskola Baziku Filiar Manelima (EBF) falta sala de aula, nune fó impaktu ba estudante sira iha prosesu aprendizajen, tanba eskola refere iha sala 4, estudante husi primeiru ano no segundu ano tama hamutuk iha Sala ida, no estudante quarto ano no quinto ano tama hamutuk ho aula, situasaun ne’e halo estudante sira susar atu entende matéria ho dia’k.
Koordenadór EBF, Anibal Da Silva informa problema bo’ot iha eskola mak falta sala de aula, tanba durante tinan 22 ona, maibe eskola seidauk iha mudansa tanba eskola ne’e iha de’it sala aula ha’at (4), ne’e problema bo’ot ne’ebé durante ne’e eskola hasoru, no fatin eskritóriu mos professores sira uza hodi hanorin estudante sira.
“Ami nia eskola ne’e sala de aula menus, no bainhira estudante sira tama aula hadau malu ho kadeira meza, Durante ne’e estudante sira sempre asesu ba livru sira, maibe bibloteka ne’e ami uza ba sala de aula entaun okupa ba iha estudante sira atu lori hanorin “, Kordenador EBF informa ba Neon Metin iha Postu-Administrativu Laclubar Munisipiu Manatuto, 03/06.
Nia konfesa ba Neon Metin katak, daudaun ne’e sira uza hela sala ha’at hodi hanorin labarik Multi-klasse, estudante sira ne’ebé tama hamutuk hanesan primeiru ano no segundo ano, tama hamutuk iha sala ida e depois quartu ano no quinto ano tama hamutuk iha aula ida, no Terceiro ano Sesto ano mak tama ketak-ketak.
Iha eskola ne’e Professores sira hamutuk nain lima, permanente nain tolu no kontrotadu rua inklui parsiál ida.
