Reportajen Silvino Freitas
Sekretáriu Estadu Formasaun Profisionál no Empregu (SEFOPE) nafatin enkoraja trabaladór sira ba servisu iha Australia hodi bele servisu ho dixiplina atu tane dignidade nasaun nian, nune’e mós governu nafatin esforsu atu traballadór sira labele halai husi sistema hodi bele servisu ho dignu no seguru.
Tuir Reprezentante SEFOPE atuál Diretór Jerál SEFOPE Jacinto Rebeiro hateten, antes trabalador sira atu ba hala’o servisu iha estranjéiru tenke iha konkordánsia entre família no governu, nune’e mós hetan korajen no mensajen atu sira bele hala’o servisu ho di’ak hodi tane dignidade nasaun nian.
“Sira ne’ebé dadaun ne’e atu ba sira iha kompaña 4 ho trabalador nain 30 kompostu husi feto 3 no mane 27, sira sei desloka tuir viza ne’ebé simu iha fulan outubru nia laran” dehan reprezentante SEFOPE atuál Diretór Jerál SEFOPE Jacinto Ribeiro iha salaun SEFOPE Kaikoli Dili, (05/10).
Nia dehan tan, traballadór sira ne’ebé tama ona serimónia despedida ne’e priense hotu ona rekezitu sira ka selesaun kritéria ne’ebé SEFOPE fó sai.
Fatin hanesan, Diretór Nasionál Empregu Exteriór João Pereira katak, iha tinan 2023 tuir dadus iha ona trabaladór liu 2000 ne’e hanesan dadus temporariu tanba tinan 2023 mós seida’uk remata no sei iha mós traballadór foun no tuan mós hala’o hela movimentasaun ba mai.
“Kona-ba trabalador sira ne’ebé ses husi sistema ami mós ko’alia ona problema lubuk ida ho embaixadadora no adidu sira tanba sira mak iha kompeténsia iha Australia, maibé governu la taka matan tenta nafatin ho meius oioin, nune’e Timoroan sira bele servisu nafatin ho dignu no seguru hodi labele sai husi sistema ne’ebé estabelese ona” dehan Diretór João Pereira.
