Reportajen Joselina dos Santos
Sekretariu Estadu ba Igualdade (SEI), realiza Planu Estratéjiku durante tinan 5, hahú 2023-2028. Objetivu workshop ne’e atu asegura no garante implementasaun programa SEI nian, hodi atinje ba indikadór no metas tinan 5 nian, relasiona ho asuntu promove igualdade jéneru no inkluzaun ba setór hotu iha instituisaun estadu no sosiedade sira.
Ba jornalista sira Sekretáriu Estadu ba Igualdade (SEI), Elvina Sousa Carvalho hateten, SEI halo kolókiu validasaun ba iha Planu Estratéjiku SEI nian, tanba importante tebes ba instituisaun. Kolókiu ne’e objetivu atu konvida parseiru Nasionál no internasionál, Sosiedade Sivíl no Liña Ministeriais sira hodi entende vizaun, misaun no atividade sira no mós planu estratéjiku SEI nian durante tinan 5.
Ho ida ne’e, atu bele asegura igualdade jéneru iha polítika lei no asaun sira atu atinje objetivu igual no laiha diskriminasaun iha sosiedade nia leet, ho ida ne’e mak SEI konvida parseiru Nasionál no Internasionál sira karik hakarak atu kolaborasaun tenke haree mos ba Planu Estratéjiku SEI nian.
“Ha’u hanoin importante tebes tanba primeiru mak dezenvolvimentu instituisaun SEI rasik, hanesan instituisaun governu ida presiza asegura servisu SEI nian liu-liu planu asaun anuál no mós dezenvolve rekursu umanu. Atividade Workshop ohin ne’e mós hanesan matadalan ba parseiru Nasionál no Internasionál atu bele servisu hamutuk ho SEI”, Dehan Elvina Sousa Carvalho, iha Salaun City 8 Has Laran Manleuana, Kinta/10.
Nune’e SEI iha kompeténsia própria ba promosaun igualdade jéneru no inkluzaun liuhosi planu orsamentál programa no lei sira, atu servisu di’ak la’os papél SEI de’it, maibé ne’e papél liña Ministeriais tomak ne’ebe responsavel ba ema hotu nian atu atinje igualdade.
Iha fatin hanesan, Sosiedade Sivíl Liuhosi Prezidente Asosiasaun Feto Munisípiu Díli (AFMD), Maria Fatima Amorin Pereira hatutan, objetivu ohin ne’e ba atividade SEI nian ne’ebé fó prioridade liu ba planu estratéjiku 2023-2028. No Atividade ne’e haree ba parte igualdade jéneru nian ne’ebe foka liu ba programa prioridade forsa hodi hakbiit feto sira liuhosi Asosiasaun Feto Munispiu Díli, tanba nia papel relasaun ho SEI nian programa foka liu ba eleisaun suku 2023-2028 nian.
“Dadaun ne’e ami prepara hela kandidatu feto sira ba iha eleisaun suku iha Postu-Administrativu 5 ne’ebe ami identifika liuhosi 31 Suku hamutuk ema-na’in 13. Kandidatu sira ne’e mak hanesan kandidatu ba Xefe Suku, Xefe Aldeia no delegada feto sira, ami haforsa sira-nia knaar liuhosi programa no formasaun sira ne’ebe ami prepara”, nia esplika.
