Reportajen Umbelina dos Reis
Fundasaun Mahein realiza Konferénsia Imprensa ba relatoriu “Reforma Imediatu ba Polícia Cientifica de Investigação kriminal” konteúdu relatóriu ne’e ko’alia konaba hahalok líderansa superior Policia Cientifika, de Investigação Criminal (PCIC) nian ne’ebé deskonfia envolve ou komete kazu krime, abuzu de poder e iregularidade.
Diretór Operasional Fundasaun Mahein (FM) Abel Amaral, liu hosi konferénsia imprensa informa, halo investigasaun kle’an hodi aselera prosesu reforma ba PCIC, iha loron 2 Outubro 2023, Media Online Hatutan fó sai notisia importante deskreve kona-ba alegasaun akuzasaun liga ho hahalok lideransa superior Polícia Científica de Investigação Criminal (PCIC) nian, tuir artigu media Hatutan nia informação refere liu hosi “karta protestu hosi internal PCIC”, iha ne’ebé deskonfia envolve ou komete kazu krime, abuzu de poder no irregularidade sira hosi superior PCIC nian ne’ebé notisia ne’e identifika.
“Deskonfia iha individu balun ne’ebé la prenxe rekeiszitus hosi Dekretu-Lei Nú.15/2014 ho nível edukasaun Eskola Sekundáriu de’it, nomeia ba kargu xefia iha PCIC hosi 2015 no kontinua nomeia to’o 2025, pessoal ne’e mos deskonfia komete krime ne’ebé rejistu iha Ministériu Públiku ho Comissão Anti-Corrupsaun ne’ebé parte sira kosnstitui ona hanesan arguidou ba krime burla agravadu tamba deskonfia simu vítima sira-nia osan (montante hale’u $700.00) inklui abuzu poder tamba utiliza edifísiu PCIC hodi resolve problema partikular balun (kazu sira ne’e deskonfia taka ka konjela tiha de’it.” Dehan Diretor Operasional Fundasaun Mahein, Abel Amaral, liu hosi konferénsia imprensa iha edifisiu FM, kinta-feira, 05/10.
Nia hatutan, diskriminasaun hosi superior PCIC nian iha prosesu formasaun ba espesialista no investigador nian iha rai li’ur ka delega de’it ema konfiansa superior PCIC nian maka ba tuir formasaun iha rai li’ur, deskonfia uza poder hodi asegura pessoal konfiansa balun iha PCIC fasilita fó treinu ba ezekutivu PCIC nia oan-mane utiliza armas PCIC nian no prátika tiru iha karrega de tiru PCIC nian iha área Kaitehu, munisípiu Liquiça. Deskonfia iha mos kazu utiliza armas hodi ameaça ema seluk iha PCIC, tamba problema feto no vítima hato’o keixa ba superior PCIC, maibé la hola medida tamba individu refere pertence ba superior PCIC balun nia ema konfiansa. Deskonfia iha mos pessoal kargu xefia balun iha PCIC halo lakon motorizada estadu nian, maibe procesu ne’e rai de’it iha superior sira nia “gaveta” laran.
“Iha fulan-Fevereiru 2023, pesoal kargu xefia ida hetan pena suspensaun fulan rua hosi Tribunal, maibe superior PCIC nian kontinua promove pessoal refere hodi exerse funsaun nu’udar xefe iha PCIC, maske Comissão da Função Pública (CFP) ho Ministru Justisa, Tiago Sarmento la aprova, ho razaun katak funsionáriu públiku ka agente administrasaun públiku ida ne’ebé hetan ona sansaun dixiplinar suspensaun labele hetan promosaun.” Nia informa.
Nia informa tan, deskonfia iha mos kazu amante, entre kargu xefia balun iha PCIC, to’o baku-malu iha arredores PCIC nian no rezulta vidru edifísiu PCIC nian rua rahun, kazu ne’e parte sira hosi PCIC uza poder no forsa, inklui lori arma ba ameasa família feto nian hodi rezolve, superior sira iha PCIC deskonfia taka de’it ou laloke prosesu disxiplinar tamba pessoal rua ne’ebé komete kazu amante ne’e nu’udar konfiansa superior PCIC nian.
Durante ne’e Fundasaun Mahein observa direita irregularidade balun envolve iha membru PCIC no instituisaun funsionamentu nian, akontese tanba fator oin-oin hosi lideransa PCIC nian, liu-liu inkapasidade lideransa PCIC nian hodi impoen lei no regulamentu no halo servisu la imparsial no diskrimina ema bazeia ba relasaun pessoal.
“Tanba ne’e FM husu ba governu tenki halo investigasaun kle’an no imediata hodi konfirma akuzasaun sira ligadu ho krime, abuso de poder no irregularidade, liu hosi prosesu investigasaun ne’e, Governu bele dezenvolve programa kompreensivu hodi reforma no kapasita PCIC, objetivu atu hametin nia kapasidade ba asoens prevensaun, detensaun no investigasaun krime.”
Fundasaun Mahein rekomenda ba Parlamentu Nacional (PN) kria komisaun eventual hodi halo investigasaun ba kazu ne’ebé envolve superior sira PCIC nian no aselera prosessu reforma ba PCIC ne’ebé tama iha kompetensia PN nian, liu hosi alterasaun. Bazeia ba rezultadu prosesu ne’e, Governu bele kria planu reforma komprensivu ba PCIC nu’udar programa prinsipal hosi IX Governu konstituisional 120 dias mandatu Governo nian.
