Home Notisia Konferensia FRETILIN: Konfirma Unidade Lideransa Partidu Metin Liutan

Konferensia FRETILIN: Konfirma Unidade Lideransa Partidu Metin Liutan

983
0
SekJer FRETILIN Mari Alkatiri, ho Jose Manuel Nakfilak, Rui Araujo 'Agil' hananu muzika "Mai Ita Hamutuk," iha Konferensia FRETILIN nian

Komunikadu Imprensa FRETILIN ne’ebe publika ohin (22/09), loron ikus Konferensia Jeral Kuadru FRETILIN nian ba datolu hala’o iha City Eight, Dili, Konfirma katak unidade partidu nian no lideransa partidu metin liutan.

Iha deklarasaun final Konferensia jeral kuadru FRETILIN nian konklui ho determinasaun boot atu; Hametin FRETILIIN nia unidade no satan tiha tentativa externa oioin ne’ebé atu harahun FRETILIN; Hahu programa formasaun polítika patriótika; Hala’o levantamentu dadus no serbisu hamutuk ho eleitor foun sira ho idade tinan 17 to’o 21; Kontinua implementasaun husi deklarasaun Viqueque ne’ebé koalia kona-ba atividade socio-ekonomíkas; no hahu prepara ba FRETILIN nia vitoria iha eleisaun sira tuir mai; iha nivel nasional no munisipiu sira.

Iha diskurus Sekretariu Jeral FRETILIN, Mari Alkatiru, iha loron dahuluk hato’o nia preokupasaun kona ba inflensia poder informal nian iha estadu dereitu nian laran.

“Kontinua defende Estadu de Direitu Demokrátiku no atu impede ninia diluisaun ne’ebé provoka husi afirmasaun “poder informal” ida ne’ebé hakarak atu kondúz destinu nasaun nian haksumik tiha orgaun soberania sira nia funsionamentu,” Mari Alkatiri hato’o.

Iha nia intervensaun loron ikus konferensia nian nia fo notas optimizmu bo’ot hodi prepara partidu ba vitoria.

“Ita tenke sai hosi konferensia ne’e no kontinua halo preparasaun ba vitoria ho unidade ida metin liutan. Dezafiu oioin mak mosu sei resolve iha orgaun propriu partidu nian,” Mari Alkatiri dehan.

Konferensia Jeral kuadru FRETILIN nian ba datolu hala’o iha City Eight, Dili, hosi loron 21 – 22 Setembru 2019 ho tema ‘Patria no Soberania – Husi Konseitus ba Kultura no Vida Institusional.’ Konferensia Jeral kuadru FRETILIN nian ne’e halibur konferensistas liu ema nain 600 husi estrutura munisipiu 12 no RAEOA, organizasaun massa no organizasaun filiada no kuadru tékniku sira FRETILIN nian ho objetivu atu halo analize ba lala’ok vida estadu Timor-Leste nian dadauk ne’e.

 

 

 

 

LEAVE A REPLY

Please enter your comment!
Please enter your name here