Home Justisa PNTL Husu Mandadu Ba MP, Hodi Kaptura Autor Ne’ebe Baku Nina

PNTL Husu Mandadu Ba MP, Hodi Kaptura Autor Ne’ebe Baku Nina

722
0
Nina Ximenes ne'ebe uza farda eskola iha tempu Indonesia, partisipa iha demonstrasaun hasoru rezime militar Indonesia nian, hodi luta ba ukun rasik an. [Foto: copyright ih facebook | 23.09.2019]

Nina naran istimadu ne’ebe mak nia belun sira babain bolu, Nina nudar joven ida bainhira iha tempu okupasaun, ho idade kiik no sei uza farda eskola sekundariu maibe nia komesa hahu nia involmentu iha demonstrasaun, hodi hasoru tropas Indonesia

Relasiona ho violência fiziku hasoru maluk ho difisiensia mental, Paulina Ximenes [Nina] ne’ebe halo hosi estudante UNITAL nain rua. Violensia fiziku ne’ebe mak halo hasoru Nina, nudar hahalok grave.

Ho situasaun ida ne’e, Komando Polisia Municipio Dili, [KPMD], Superintendente Xefe, Armando Monteiro husu mandadu kapturasaun ba Ministeriu Publiku [MP], hodi bele kaptura autor nain rua ne’ebe halo agresaun fiziku hasoru vitima Nina ne’ebe ho kondisaun difisiensia.

“Ita simu tiha ona keixa no ita rona ona sosiadade sira nian prekupasaun iha media sosial, ida ne’e hanesan krime públiku, PNTL prepara ona oinsa atu bele identifika suspeito sira, no dadaun ne’e ita husu ba Ministeriu Públiku, hodi bele hatun mandadu kapturasaun”, dehan Armando ba Jornalista sira iha nian knara fatin, KPMD, Kaikoli-Dili, 23/09.

Komando Armando hakleantan katak, kazu ne’e akontese iha loron hirak liu ba, ne’ebé ema balun publika liu hosi media sosial facebook, ne’ebé hetan lamentasaun hosi publiku no ejize ba PNTL, atu buka tuir ema hirak ne’ebé halo agresaun ba vitima refere hodi prosesa ba justisa.

“Aktu ne’ebé halo hosi joven nain rua, ne’ebé mos hanesan estudante hosi universitariu balun, ne’e hanesan la dignifika universidade ne’ebé mak sira halao sira nian prosesesu estudu ba”, tenik Armando.

Publiku no PNTL preokupa ba akontesementu refere, tanba akontesementu ne’e akontese besik area universitariu, tuir Komando Armando katak, tuir lolos fatin ida ne’e, atu eduka ema, atu say ema no tranforma ita nia komportamentu, maibe la utiliza fatin ida ne’e, no la dignifika fatin ida ne’e, hodi viola no halo asaun krime.

Komando Armando hatutuan katak aktus saida de’it mak mosu tantu públika, no flagrante de leito, no fora hosi fragante de leito PNTL rona no hatene sei kanaliza ba servisu informasaun polísia no servisu investigasaun criminal hodi halo identifikasaun no halo kapturasaun.

Enkuantu bainhira jornalista sira identidade ba autor ne’ebe violência, maibé polisia sedauk bele fo sai tanba sei iha prosesu investigasaun.

Nina naran istimadu ne’ebe mak nia belun sira babain bolu, Nina nudar joven ida bainhira iha tempu okupasaun, ho idade kiik no sei uza farda eskola sekundariu maibe nia komesa hahu nia involmentu iha demonstrasaun, hodi hasoru tropas Indonesia.

Iha loron 12 Novembru 1991, Nina ho idade nurak, maibe ho nia aten brani partisipa iha asaun pasifika, hodi hakilar no hasoru tropas Indonesia katak povu maubere hakarak ukun rasik an.

Nina oin midar, ne’ebe os involve an iha grupu basket, no sai nudar equipa nacional feto nian, hodi partisipa iha eventu internacional hanesan Ara Fura Cup iha Darwin-Australia , nia mos membro Associasaun Brigada Negra [ACBN]. ACBN nudar organizasaun da rezistensia ne’ebe uluk halibur juventude sira, hodi luta ba Timor-Leste nia ukun an.

Nina nia luta hamutuk ho joven sira seluk, ohin loron hatudu rezultadu boot ba povu maubere katak, povu ses ona hosi ukun kolonializmu no iha nia bandeira rasik mak bandeira RDTL.

Publiku no Nina nian belun sira kontinua ezije ba estadu atu bele resolve kazu ne’e tuir Lei ne’ebe iha, no husu ba publiku atu hapara violência hasoru joven sira, liu-liu maluk sira ho difiensiente. * [ Francisco Jose De Almeida | Editor: Zevonia Vieira | Neon Metin | 23.09.2019 ]

 

LEAVE A REPLY

Please enter your comment!
Please enter your name here