Reportajen Silvino Freitas
Kandidatu kadetes foun Polisia Nasional Timor-Leste (PNTL) tinan 2025 neebe la tuir teste mediku sei uza autonomia kampus FASPOL UNTL halo asaun pasifika iha segunda feira loron 16 fulan marsu hodi antisipa ba prazu suspensaun ba prosesu rekrutamentu kadetes foun atu dezisaun neebe husi komisaun revizaun tuir sira nia ejizensia maka kansela totál.
Portavoz kadetes foun Tito Orelans dehan, sira hatoo ona karta rekonesimentu ba PNTL atu halo asaun iha segunda feira loron 16 uza autonomia kampus FASPOL UNTL atu halo asaun pasifika tanba ne’e sira hatoo mos karta autorizasaun husi universidade atu autoriza fatin hodi halo manifestasaun durante fulan ida, maibé iha tendensia atu la halo autorizasaun halo asaun maibé sira konsidera karta ne’ebe hatoo ba universidade ho polísia atu hetan asegurasaun tanba asuntu sosial ne’e ema hotu nia responsabilidade inklui kampus.
“Iha manifestasaun nee kadetes ami liu rihun sanulu ne’e organizadu ami hetan apoiu mos husi EUTL movimentu sosial sira hotu, tanba ne’e asuntu sosial neebe ita hotu nia responsabilidade tanba ne’e maka ita tenke unifika forsa hamutuk atu halakon nepotizmu grupuizmu no favotirizmu” dehan portavoz Tito Orelans iha HAK Farol, (13/03).
Nia dehan tan, manifestasaun ne’ebe sira atu halo iha segunda feira nee parte ida atu desizaun ne’e labele hamosu injustu nafatin tanba ba teste mediku konserteza sira sei liu nafatin tanba husu asaun ne’e atu antisipa hodi prevene labele ba teste mediku, nunee asaun nee parte ida atu halo presaun nune’e governu bele deside tuir sira nia ejizensia, tanba prezidente komisaun ba revizaun nee mos antes ne’e sai komisaun hodi asina akta ba ema nain 400 ne’ebe atu tuir teste mediku ne’e inklui mos iha komisaun anterior tanba nee maka tenke dozolve total.
“Prezidenti komisaun ba revizaun nia mos asina akta ba 400 pesoas nee entaun ita lakohi atu buat sira akontese nafatin, entaun sira ho sira mak atu investiga malu ne’e labele ita hakarak mai ho indepedente no transparansia justu ba prosesu sira ne’e” dehan portavoz Tito Orelans.
Fatin hanesan kandidatu Angelino Pereira dehan, problema ne’ebe sira infrenta laos ba kadetes sira de’it maibe ne’e problema sosial ne’ebe sosiedade infrenta tanba ne’e sira ejiji katak husi sira 1197 laos de’it ejiji atu ba kadetes foun maibe sira hakarak halakon sistema familiarizmu nune’e ba futuru jerasaun sira labele sai tan vitima, tanba ne’e sira kontinua luta no husu sosiedade sivil inklui PDHJ atu akompana nafatin ba susspensaun ne’ebe sei termina iha segunda feira atu tuir ejijensia ne’ebe hatoo ona.
“Iha prosesu rekrutamentu nee ami haree akompaña nee laloos sistema ne’ebe mai ho familiarizmu trata ema la justu no tribunal rekursu deklara ona inkontituisional ba fahe pursentu, maski ami povu bainbain nia oan iha kapasidade diak patriotizmu diak hakarak sai seguransa hodi proteje ita ita nia ema sira tan de’it ita laiha pursentu ne’ebe iha ita labele ba atu servi ita nia rain ida nee” dehan Angelino Pereira iha HAK Farol.
Lembra fali katak, prosesu rekrutamentu ba kadetes foun PNTL tinan 2025 tama ona ba faze teste mediku ne’ebe kandidatu liu rihun sanulu resin mak aprovadu maibe komisaun foti de’it nain 40 tuir numeiru kuota munisipiu nian, maibé tanba deskonfia mosu iregularidade iha prosesu rekrutamentu hetan ejijensia husi sosiedade, nune’e nonu governu liuhusi konsellu ministru deside halo suspensaun hodi halo revizaun durante loron 20 neebe prazu sei remata iha loron 16 fulan marsu.
