Reportajen Silvino Freitas
Raes Hadomi Timor Oan (RHTO) realiza assembleia jerál no semináriu hodi rona progressu no programa ba implementasaun konvensaun internasionál direitu ema ho difisiensia husi parte governu ba planu asaun nasionál ba ema ho difisénsia, nune’e husi ratifikasaun ba konvensaun internasionál ba direitu ema ho difisiensia ne’e hahú ona fo benefísiu ba ema ho difisiensia mak hanesan subsidiu ba ema difisiensia no bolsa da mae kondisionál.
Diretór Executivu RHTO Joazito dos Santos dehan, assembleia jerál ne’ebé RHTO organiza atu rona programa ba implementasaun no progressu planu asaun nasionál ba ema ho difisiensia husi minisiteriu saúde, ministeriu solidaridade sosiál no ministeriu edukasaun, nune’e husi parte governu iha komitmentu atu ministeriu hotu hotu tenke halo ninia kna’ar hodi asegura planu asaun nasionál ba ema ho difisiensia hodi reflete ba konvensaun ONU ba direitu ema ho difisiensia nian.
“Ratifikasaun ba konvensaun ne’e iha tiha ona ninia benefísiu antes ona subsidiu, bolsa da mae kondisionál ba ema ho difisiensia no MSSI mak sai sekretariadu ba implementasaun planu asaun nasionál ba ema ho difisénsia nian refere no fiar katak servisu hamutuk hodi estabelese tan konsellu nasionál ba ema ho difisiensia, nune’e mós iha konvensaun ne’ebé ratifika ona maskí lori tempu narauk tebes” dehan Jaozito ba jornalista sira iha Tower-Fatuhada, (20/11).
Nia dehan tan, dadaun ne’e RHTO iha tinan ne’e besik 100 mak sira referal, maibé ema ho difisiensia barak mak seida’uk hetan tanba kritéria ne’e tenke hasoru ministeriu 4 nune’e presiza eleitorál, sertifika saúde ba grau difisiensia, hatama ba sistema iha ministeriu solidaridade sosiál no ministeriu justisa ne’e lori prosesu naruk tebes atu bele hetan subsidiu ba sira nia kondisaun nuudar ema ho difisénsia.
Fatin hanesan Diretór Jerál MSSI Florencio Gonzaga dehan, implementasaun planu asaun nasionál ba ema difisiensia ne’e iha pontus posetivu balun ne’ebé konsege atinji tanba iha area saúde nian lao ho diak, edukasaun inkluzivu la’o di’ak tanba iha fatin balun di’ak tebes ba ema ho difisiente, husi minisiteriu solidaridade sosiál kada tinan fo apoiu baze ba programa ne’ebé sira iha inklui mós subsidiu ba ema difisiensia sira.
“Iha programa tolu importante iha ministériu solidaridade sosiál liuhusi institute nasionál seguransa sosiál kona-ba subsidiu, institute nasionál tau matan ba ema ho difisénsia no ida mak bolsa da mae kondisionál” konklui DJ Florencio.
