Home Justisa RDDU Kondena Makaas Aktu Violentu Hasoru Nina, Respeita & Valoriza Maluk Ho...

RDDU Kondena Makaas Aktu Violentu Hasoru Nina, Respeita & Valoriza Maluk Ho Difisiensia Mental

210
0
Rede Defensór Direitus Umanus halo konferensia imprensa ho jornalista sira iha HAK-Farol. [Foto: Francisco J.de Almeida | 23.09.2019]

“RDDU kondena maka’as tebes wainhira haree estudante intelektual sira ne’ebé utiliza uniforme ( almamater) universidade nian mak komete violentu ida ne’e hasoru sidadaun ho kondisaun defisiensia”. Umbelina

 Kazu violensia fiziku hasoru maluk ho difisiensia mental, Paulina Ximenes [Nina], ne’ebe halo hosi estudante UNITAL, hamosu reasaun makaas hosi Rede Defensor Direitus Umanus [RDDU].

Liu hosi konferensia imprensa ba jornalista sira, RDDU deklara katak kondena makaas aktu violente ne’ebe joven balun halo, hodi halo asaun ba inan-feton ne’ebe ho kondisaun difisiensia mental.

Rede Defensor Direitus Umanus husu ba ema hotu, hodi respeita no valorize ema ho difisiensia iha paiz ida ne’e.

Ba jornalista sita, porta-voz Umbelina A. Soares hateten, RDDU apela ba ema hotu, atu respeita no tane aas prinsipiu no valores direitus umanus, ne’ebé konsagra ona iha konstituisaun RDTL, no mós tratadu internasionais, sira ne’ebé estadu Timor-Leste opta ona. Prinsipiu no valores sira ne’e tenke tau iha pratika atu nune’e nein ema ida sei laiha direitu atu halo diskriminasaun, violasaun no tratamentu aat hasoru sidadaun sira seluk nomós ema difisiensia Timor-Leste.

Umbelina deklara katak, RDDU kondena maka’as ho hahalok ne’ebé joven balun ne’ebé komete hasoru inan feton ho kondisaun defisiensia ne’ebé espailla iha publiku, iha media sosial [facebook], grupu joven lubuk ida ne’ebé hobur no hateke de’it bainhira joven sira na’in rua seluk halo asaun violentu hasoru ema ho defisiensia psiko-sosial ida ne’e.

“RDDU kondena maka’as tebes wainhira haree estudante intelektual sira ne’ebé utiliza uniforme ( almamater) universidade nian mak komete violentu ida ne’e hasoru sidadaun ho kondisaun defisiensia”, tenik Umbelina, iha salaun HAK, Farol 23/09.

Rede Defensór Direitus Umanus husu ba PNTL, liliu Unidade Investigasaun Kriminal, imediatamente buka tuir autór sira ne’ebé komete aktu violentu hasoru ema ho difisiensia ne’ebé espalla iha media sosial, husu mós Ministerio Publiku atu investiga lalais autór principal sira ne’ebé komete hasoru inan feton ida ne’ebé kondisaun difisiensia.

RDDU mos ezije ba Tribunal atu kondena ema hirak ne’ebé halo krimi hasoru sidadaun ho defisiensia tuir Lei ne’ebé eziste ona, husu mós ba PDHJ atu apoiu prosesu ida ne’e hodi identifika autór ne’ebé komete violasaun hasoru inan feton ho difisiensia psiko-sosial.

B autor sira ne’ebe mak halo aktu violentu hasoru Nina, RDDU husu atu kolabora ho polisia no entrega-an

“Husu ba ema hotu atu kolabora liuliu sira ne’ebé sai testamuña ba aktu ne’e, hodi hato’o informasaun ba PNTL ka autóridade lokal sira, atu bele buka tuir autór sira, husu ema atu respeitu no valoriza direitu sidadaun sira hotu, inklui ema ho defisiensia iha paiz ida ne’e. Husu ba estadu Timor-Leste atu ratifika konvensaun internasional kona-ba Direitu ema ho defisiensia nu’udar asaun urjente”, porta-voz Umbelina ezije

Iha fatin hanesan, koordenador RDDU, Inocencio Xavier hateten, sira lamenta teb-tebes ba sira ne’ebé mak joven balun halo asaun hasoru inan-feton ne’ebé moras mental.

“Asaun ne’ebé joven balun halo ba ita inan-feton ne’ebé ho kondisaun defisiensia mental, ami lamenta, ami nia papel no obrigasaun fó pozisaun ba aktu ne’ebé mak komete husi ita nia joven balun halo ba mana Nina”, dehan koordenador Inocencio Xavier.

Rede Defensór Direitus Umanus (RDDU) kompostu husi organizasaun sosiedade sivil sira ne’ebé tau matan ba asuntu direitus umanus, ne’ebé akontese iha Timor-Leste.* [ Santina Lucia Da Costa | Editor: Zevonia Vieira | NEON METIN | 23.09.2019 ]

 

LEAVE A REPLY

Please enter your comment!
Please enter your name here