Home Notisia MAPCOMS Sei Koopera Ho AJTL, Defende Liberdade Imprensa no Espresaun Tuir AJTL...

MAPCOMS Sei Koopera Ho AJTL, Defende Liberdade Imprensa no Espresaun Tuir AJTL nia Misaun

314
0
MAPCOMS hasae hamutuk ho estrutra no fundador AJTL. [Foto: Francisco JDA |10.08.2020]

Reportazen Francisco JDA

Ministeriu Asuntus Parlamemtares Asuntus  Komunikasaun Sosial (MAPCOMS) vizita edifisiu Asosiasaun Jornalista Timor Lorosa’e (AJTL) ho objetivu hodi rona opiniaun ne’ebé iha relevansia ho asuntus jornalista nian, nune’e iha futuru iha kooperasaun ne’ebé mak di’ak liu tan, ba dezenvolvimentu media no jornalista sira ho kualidade.

Iha vizita ne’e Ministeriu Asuntus Parlamemtares no Komunikasaun Sosial, Francisco Jeronimo iha intervensaun hateten governu liuliu MAPKOMS kontinua halo kooperasaun ba entidade hotu liuliu iha area media nian.

“Ita sei ko’alia ba malu saida mak ita bele halo,  halo hamutuk atu nune’e fo apoio malu nafatin atu entidade sira ne’e la’o nafatin ba oin, defende saida mak sai ona ita boot sira nia objetivu no mehi, liu-liu ba liberdade imprensa ne’ebe tenki livre duni, la iha intervensaun tama iha leet, hodi impata fali ita nia servisu”, hateten Francisco Jeronimo  iha sede AJTL, 07/08.

Ministru dehan governu em prinsipiu nakloke ba hotu hotu, atu koopera hamutuk, buat ruma ne’ebé dalaruma  naksalak  ba malu, dalan dahuluk mak dialogu. Se la konsege halo dialogu, buka dalan seluk ne’ebé di’ak liu, maibé dalan di’ak liu mak dialogu nune’e bele aprende hamutuk, hodi dezenvolve rai ida ne’e liu hosi media.

Iha fatin hanesan Prezidente AJTL, Zevonia Vieira iha intervensaun hateten, tuir misaun AJTL nian klaru defende Liberdade imprensa no espresaun, no mos kapasita nia membru sira hodi hasae sira nia kualidade iha mundu jurnalismu, laos deit jornalista sira maibe membru ativu sira hanesan estudante komunikasaun sosial, blogger, photographer, peskizador, ativista direitu umanus no sira seluktan.

Zevonia hateten tuir planu estrategia ne’ebe mak estrutra halo ona katak iha periodu ida ne’e hare liu ba asumtu jurnalismu sensivel ba jeneru, oinsa mak membru sira iha konnesementu konaba prespektiva jeneru iha sala redasaun no iha reportazen. Formasaun seluk mos AJTL koko foka bai ha seitor fundu petroliferu, direitu humanus, ekonomia, saude, politika no seluktan.

Prezidente AJTL mos inform aba MAPCOMS katak AJTL kontinua halo parseria ho UNDP, UNESCO, Aliansi Jurnalis Independen (AJI), Southeast Asian Press Alliance (SEAPA), ICRC no sira seluktan, ho objetivu hodi hasae kapasidade membru sira no kontinua promove Liberdade imprensa no espresaun iha rejional.

Fundador AJTL, Virgilio Guterres iha enkontru ne’e mos fo hanoin ba MAPCOMS, atu bele kria komunikasaun iha ministerial oinsa sira nia departamentu komunikasaun sosial sira bele halo kooperasaun diak ho media sira, no bele prepara komunikadu imprensa relasiona ho serbisu governu nian, hodi bele fahe ba media sira.

Virgilio mos hateten AJTL mos tenke kapasita nia membru sira, hodi hatene konaba kode etik, prinsipiu demokrasia no direitu humanus, nune’e bele komprende diak konaba Liberdade imprensa no espresaun, “bele ezekuta Liberdade, bainhira liberdade ne’e iha”.

Iha enkontru ne’ebe partisipa mos fundador AJTL sira hanesan Virgilio Guterres atul Prezidente Konselho Imprensa (KI) no Zesopol Caminha.

LEAVE A REPLY

Please enter your comment!
Please enter your name here