Reportajen Silvino Freitas
Estadu Timor Leste liuhusi, Sekretáriu Estadu Formasaun Professionál Empregu (SEFOPE) despede tan traballadór nain 40 ba servisu iha Korea, nune’e SEFOPE husu atu nafatin kumpre regra ne’ebé estadu fó sai hodi mantein iha sistema laran, atu bele hetan direitu asuransia, karik sai illegal mak kompaña sei fase liman.
SEFOPE Rogério Mendonça hateten, traballadór sira ne’ebé atu ba servisu iha Korea-Súl di’ak liu kumpri lei ne’ebé estabelese ona husi estadu rua karik maka la kumpri lei refere no buka osan boot maka hetan problema ruma iha servisu fatin maka sei laiha responsabilidade husi kompaña.
“Ita boot sira ba buka ilegal hodi la selu taxa ba kompaña, karik hetan moras ka problema ruma iha servisu fatin kompaña sei fase-liman, maibé imi kumpre hodi hela iha sistema laran mak imi aumatikamente estadu Timor no Korea sei ejiji direitu ita bo’ot sira nian” dehan Rogério iha serimónia asina kontratu iha Timor Lodge Dili, (01/09).
Nia dehan tan, husi parte família sira mós tenke fo hanoin ba oan sira atu servisu iha sistema laran kuandu iha ona illegál mak kuandu iha hetan problema ruma maka sei laiha direitu atu rekere sira nia direitu, tanba ne’e família sira ne’ebé akompaña oan sira fó netik liamenon ruma katak kumpri de’it saida mak estadu haruka.
“Traballadór sira labele ba mete joga makina no karta iha ema nia rain, tanba esperánsa família nian ba imi atu hadi’a família nia moris, evita hemu tua hodi lori karreta no motor traballadór sira ne’ebé hetan asidente iha Korea no Australia tanba konsumu alkol” dehan Rogério.
Fatin hanesan Diretór Nasionál Empregu Exteriór (DNEE) Filomeno Soares hateten, estadu Timor Leste haruka tan traballadór hamutuk 40 ba servisu iha estadu Korea-Súl maka husi peska nian 29 husi fabrika nain 12 enkuantu traballadór reenter nain 4, sira ne’e mak hetan tan oportunidade atu ba servisu iha Korea-Súl.
“Ba família sira ita nafatin fó korajen ba sira hahú agora serimónia despedida ne’e labele halo festa ba sira, importante mak izola an husi hahalok la di’ak mak hemu tua atu labele prejudika, tanba sira sei teste saúde ba dalarua iha Korea karik hetan fali buat ruma iha Korea mak ema deporta osan 3000 ne’ebé hatama se mak atu selu” konklui diretór Filomeno.
