Reportajen David da Costa Gusmao
Relasiona ho Timor-oan sira ne’ebe maka agora daudaun hasoru problema iha Portugal, Ministra Negosiu Estranjeiru no Kooperasaun (MNEK), Adaljiza Albertina Xavier Reis Magno husu ba Timoroan sira iha Portugal se kondisoens ladiak bele fila mai Timor ona.
“Hodi bainrua hau hasoru sira balun iha Protugal, hau hatete ona katak se kondisoens ladiak imi bele fila mai Timor ona,” Dehan Ministra Negosiu Estranseiru no Kooperasaun (MNEK) Adaljiza Albertina xavier Reis Magno, ba jornalista sira iha palasiu Governu, Segunda 11/07.
Timoroan iha Portugal susar loos hetan servisu diak no manan osan diak, tanba sira ba Portugal laiha garantidu ida, sira ba Portugal ema bele aproveita sira, ema selu ho sira saláriu kikoan, maski sira iha kontratu mas ema la selu tuir kontratu tanba laiha garantia ida.
“Se maka lori sira ba hau lahatene ida, maibe ba ne’ebá laiha garantia ba sira nia servisu, laiha kontratu ho ema ida. Balun iha ne’e servisu, balun iha Funsionariu Publiku husik hela sira ba, ba fali para laiha garantia ba halo saida? Ida ne’e akontese, balun funsionariu Publiku, balun servisu iha kompaña sira husik hela sira ba,” tenik nia.
Maibe governu iha inisiativa la’o iha portugal buka tuir sira nafatin, haruka sira atu rejistu naran, no hela iha ne’ebe, para iha problema ruma fasil hodi buka. Mas iha Timoron balun hakarak fó balun lakoi, tanba tauk governu atu deporta sira.
Iha liur ona governu laiha ona forsa atu deporta sira, se maka iha direitu atu deporta sira ne’e rai ida sira hela ba maka iha direitu atu deporta sira. Governu Timor so ajuda deit fo trata asuntu konsulariu labele ajuda buat ida.
“Numeru la klaru ida tanba sira barak lakohi ba rejistu iha ita nia konsuladu Embaixada, ami iha porvolta lato’o 200 karik, maibe laiha serteza nain hira, tanba sira la nakloke ba Embaixada,” nia esplika.
Alende ne’e Ministra Negósiu Estranjeiru no Kooperasaun (MNEK) informa governu Timor Atu asina bilateral ho governu portugal iha prosesu negosiasaun hela maibe sei an tempu uituan, bainhira asina ona no iha ona serteja bele ba maibe laiha serteja lalika ba lai, hein governu trata hotu tiha maka bele ba.
Governu la bandu Timoroan atu bá iha Portugal mas situasaun primite no garantidu katak sei hetan servisu entaun bele ba, se lae horsida abandona governu ba buka tutuir fali, se ema barak liutan susra atu rezolve.
“Ne’ebe hau apela dala ida tan, alin sira kuandu atu ba, se imi ona garantia kontratu, vistu, imi ba imi tenke rejistu kedan ba iha rekizitu sira ne’ebé Portugal fó. mais portantu, hau apela dala ida tan se laiha serteja lalika ba lai, hein governu trata hotu iha ona serteza maka imi bele bá,” nia apela.
