Reportajen Joselina dos Santos
Bee Timor-Leste Empreza Públika (BTL, E.P), realiza seremónia asina kontratu ho kompañia Celijo Star Unipessoal Lda no kompañia Twins 2 Unipessoal Lda, ne’ebe sei implementa Projetu Konstrusaun sistema Bee-Moos no Fornesimentu & Instalasaun Prefabricated Liner Tank ba populasaun hamutuk 17.000 iha Postu-Administrativu Laclubar Munisípiu Manatuto.
Hafoin serimónia ne’e, Prezidente BTL, E.P Carlos dos Reis Peloi hateten, ohin asina kontratu ho kompañia Celijo Star Unipessoal Lda ho orsamentu $ 468,906.08 no kompañia Twins 2 Unipessoal Lda ho orsamentu $ 188,035.32, atu halo Instalasaun bee-moos ba komunidade nomós instala tanki reservatór ba Postu-Administrativu Laclubar Munisípiu Manatuto.
“Ohin ita asina ona kontratu Espera katak semana ohin sira bele mobiliza sira nia ekipa hodi tun halo servisu, tanba iha projetu rua ida kanalizasaun nia durasaun durante fulan 6 nia laran no ida seluk mak halo Instalasaun tanki Liner nia durasaun fulan 4 nia laran”, dehan, Prezidente Carlos dos Reis Peloi, iha Salaun BTL, E.P Kaikoli, kuarta 26/04.
Nia dehan Bee-moos ne’e laos de’it ba komunidade maibe sei kobre mós ba Instituisaun sira hanesan Eskola, Sede Suku, Kapela no Sentru Saúde.
Autoridade Administradór Postu-Administrativu Laclubar Munisipiu Manatuto Francisco M. Soares hatutan, ohin sira asina kontratu ho kompañia sira atu halo konstrui bee-moos ba Komunidade sira iha Postu-Administrativu Laclubar Munisipiu Manatuto tanba durante tinan naruk nia laran komunidade sira preokupa tebes ba bee-moos.
“Ita hein kompañia sira ba halo konstrusaun atu nune’e komunidade sira bele sente nia benefisiu, nomós ami agradese ba VIII governu tanba ho nia mandatu mak ohin bele asina kontratu hodi fornese Bee-moos ba Komunidade sira”, nia informa.
