Home EduTek Treinamentu Empoderamentu Feto, Josefina no Felisidade: Bele Hatene Liután Kbiit Feto Hodi...

Treinamentu Empoderamentu Feto, Josefina no Felisidade: Bele Hatene Liután Kbiit Feto Hodi Lidera

200
0
Juventude Suku Leuro - Lospalos, munisípiu Lautem. [Foto: Adroaldo | 11.07.2022]

Reportajen Adroaldo “Saretukau”

Juventude Suku Leuro – Lospalos, munisípiu Lautem haksolok tebes ho treinamentu ne’ebé organiza hosi grupu TIEN Club konabá empoderamentu feto no labarik feto. Ba sira treinamentu ida ne’e importante tebes, liu-liu ba feto sira bele hetan informasaun no komprende konabá kbiit feto nian iha sira komunidade hodi bele lidera mos.

Josefina Fernandes partisipante ida hosi treinamentu ne’e hatete, “ha’u sente kontente tanba treinamentu ne’ebé ami tuir kapas tebes no bele halo ami komprende liu tan konabá direitu feto nian,” dehan Josefina iha enseramentu tlba treinamentu iha Sede Suku Leuro, Domingu, 10/07.

Nia hatutan, iha treinamentu ne’e sira aprende konabá direitu feto nian, violénsia doméstika, asédiu seksual, matéria igualdade jéneru, oinsá empodera feto iha rural, ida ne’e vantajen tebes ba nia.

“Nia vantajen di’ak mai ami mak aumenta tan ami nia kapasidade ne’ebé mak durante ne’e sei menus, bele fo informasaun di’ak liu mai ami hodi ami bele hatene direitu feto nian.” Pesoalmente nia hakarak implementa matéria saída mak nia hetan ona ba nia maluk sira konabá direitu feto nian.

Iha fatin hanesan partisipante Felisidade Fernandes, nu’udar mos profesora EBF Leuro hato’o treinamentu sentimentu haksolok ba formasaun loron tolu nian, ne’ebé kapas tebes, ida sira bele hatutan ba maluk seluk ne’ebé seidauk hatene ou menus informasaun, liu-liu ba ni-nia estudante sira.

“Ha’u foka liu mak iha jéneru, tanba jéneru ne’e, feto no mane iha direitu la hanesan ne’e uluk, so agora ita tenki iha direitu hanesan tanba uluk so mane mak iha poder atu lidera, maibé iha tempu ida ne’e-ne’e feto mos bele iha área edukasaun, iha área ne’ebé de’it, feto mos bele,” dehan Professora Felisidade.

Tuir nia, formasaun ne’e importante liu ba sira feto sira, liu-liu ba nia kolega sira ne’ebé menus informasaun ida ne’e, maibé nia sei hatutan para sira mos bele komprende.

Iha parte sorin partisipante Brito de Jesus, agradese ba grupu TIEN CLUB ne’ebé fahe ona sira nia matenek no esperiénsia ba sira, “ami sei implementa iha ami nia suku, katak iha ami nia suku sei minimiza violénsia doméstika, jéneru iha ami nia suku tanba ami hetan ona matéria hosi ita boot sira.”

Nia mos rekomenda ba grupu TIEN CLUB atu kontinua programa ida ne’e ba suku seluk hodi bele hatutan informasaun sira ne’ebé bele empodera liu tan feto iha área rural.

Iha parte sorin Prezidente TIEN Club, Marzenio Lopes hato’o, durante loron tolu, juventude suku Leuro tuir treinamentu ne’e, nia husu atu sira kontinua fahe ba maluk sira ne’ebé seidauk hetan hahú hosi família.

“Durante loron tolu, matéria ne’ebé ita boot sira aprende, ba ami nia parte, ami hakarak ita boot sira kontinua fahe informasaun hirak ne’e, primeiru hahú hosi ita boot sira nia uma laran, fahe ba maun no bin sira, depois mak ita sai ba li’ur, lia-fuan Inglés ida hatete save one women, save a lot of women, wainhira ita boot sira ajuda ona ema ida, signifika katak ita boot sira ajuda ona ema barak, tanba koñesimentu ne’e sei transmite, ida ba ida.” Prezidente Tien Club

Nia husu partisipante sira nafatin fahe informasaun ba sira nia maluk hodi hodi motiva sira atu nune’e sira mos bele aprende saída mak sira aprende ona, nia dehan iha Díli sempre akontese violénsia doméstika, maibé nia kontente tanba rona hosi partisipante sira katak suku Leuro rasik seidauk akontese problema ne’ebé barak nune’e, tan ne’e nia husu atu kontinua fahe informasaun nune’e ba oin, família to’o komunidade moris ho hakmatek liu tan.

Nune’e mos Prezidente Komisaun ba aktividade ne’e, Jelito Noronha hato’o agradese ba Xefe Suku no Konsellu Suku ne’ebé disponibiliza ona fatin no estudante no joven sira partisipa iha treinamentu durante loron tolu nia laran.

Treinamentu refere organiza hosi grupu juventude TIEN Club ne’ebé hetan apoiu hosi GIZ ho tema treinamentu nia mak ‘Empower Women and Girls Through Capacity Building Training’, ne’ebé fasilita hosi membru grupu rasik durante loron tolu.

Print Friendly, PDF & Email

LEAVE A REPLY

Please enter your comment!
Please enter your name here