Reportajen estudante estajiadu UNTL, Joselina dos Santos
Sekretáriu Estadu Juventude no Desportu (SEJD), ho Primeiru Ministru Taur Matan Ruak, Diretora Alta Kompetisaun no Prestasaun SEJD, no ofisial kontinjente Timor-Leste realiza serimónia despedida ba atleta timor-oan na’in 15 inklui Xefe Demisaun, treinadór no ofisial 25, ne’ebé sei ba partisipa kompetisaun SEA para Games iha Solo-Indonezia.
Iha serimonia ne’e, Sekretáriu Estadu Juventude no Desportu (SEJD), Abrão Nokosiku Saldanha hateten lori Komité Paralimpiku Nasionál Timor-Leste (CPNTL), no atleta sira hotu nia naran, Nia hato’o agradesimentu ba Primeiru Ministru nia disponibilidade hodi despede atleta sira.
“Iha kada eventu desportu rejionál no internasionál sira, governu sempre halo esforsu hodi lori ita nia kontinjente sira ba kompete, lori Timor-Leste nia naran no bandeira. Iha desportu hamutuk ho federasaun sira, ami asume no simu dezafiu katak tempu to’o ona, atu ita husik terminolojia “partisipasaun” no hahú uza liafuan husi kompetisaun”, dehan Abrão Nokosiku Saldanha, iha nia diskursu, iha Salaun Auditóriu SEKOMS Palacio Governu, 21/07.
Governante ne’e salienta, tinan 20 liu ona, governu ho federasaun no atleta sira tenke konxiente no prontu atu ba kompete, buka medalla no buka manan. La’os ona tempu atu ba partisipa deit. Ho laran haksolok ha’u hakarak relata katak iha eventu ASEAN para Games tinan ida ne’e, ita sei ba kompete iha modalidade 3 mak hanesan modalidade para-atletizmu, para-tenis da meza no modalidade para-alterofilizmu.
“Husi federasaun atletizmu, ita sei iha atleta na’in 6 mak sei ba kompete, atleta hirak ne’e kompostu husi feto na’in 3 no mane na’in 3. Orgullu boot hakarak informa mós katak entre sira na’in 6 ne’e iha atleta ida Teófilo Freitas, ne’ebe mak ninia record Asia nian halai taru seidauk iha mak fera, nune’e ita hein katak nia rasik sei bele fera ninia record”, tenik nia
Nia dehan husi federasaun teniz no meza, atleta na’in 5 mak sei reprezenta Timor-Leste nian, feto na’in 3 no mane na’in 2. Entretantu husi federasaun alterofilizmu, sei iha atleta na’in mak ba kompete, sira na’in 4 mane hotu. Atleta sira ne’e Governu, komité hamutuk ho federasaun sira tau iha training centre durante fulan 3 ona, hahu loron 7 Maiu to’o loron ne’ebe sira dezloka ba Indonezia.
Atleta sira ne’ebe selesionadu husi kampeonatu sira tinan 2020 nian, ne’ebe ho klasifikasaun di’ak mak tinan ida ne’e reprezentante Timor-Leste kompete iha Asean para Games iha Solo-Indonezia.