Home EduTek Barnabe: Feira Livru Dada Joven Sira Gosta ba Lee no Inspira atu...

Barnabe: Feira Livru Dada Joven Sira Gosta ba Lee no Inspira atu Hakerek

490
0
Poeta Timoroan Bernabe Barreto Soares. [Foto: Adroaldo | 21.07.2022]

Reportajen Adroaldo “Saretukau”

Feira livru iha Palásiu Prezidensiál ho tema “O Livro é uma Janela para o Mundo ” iha ámbitu loron komunidade CPLP nian, Poeta Timoroan Bernabe Barreto Soares, kostuma ho Abe Barreto hatete, feira livru ne’e importante tebes, tanba liu hosi ne’e dada joven sira nia gostu ba lee nune’e sei motiva no inspira liutan sira atu hakerek, aleinde ne’e promove mos livru sira.

“Feira livru ne’e hanesan momentu di’ak ida atu promove livru sira i mos atu kria ambiente ne’ebé bele dada ema, liu-liu labarik joven sira, labarik ki’ik-oan sira, atu iha gostu ba leitura, ho nune’e kuandu gaña gostu ona, bele mos motiva ou inspira atu hakerek,” dehan Abe Barreto ba Neon Metin iha resintu Palásiu Prezidensiál, iha loron daruak ba feria livru ne’e, Sábadu, 16/07.

Nia hatutan, Timor nia ukun-aan ida ne’e presiza iha ema nia vontade ba leitura, hakerek tanba hanesan fo han ita nia klamar, se la iha, ita la kontinua hanesan nasaun ida. “Atu fo klamar ne’e liu hosi leitura, liu hosi literatura, ne’e duni mak insentiva ema hotu liu-liu ba joven sira atu iha gostu ba leitura, gostu ba lee, gostu ba hakerek.”

Nu’udar poeta ida nia hato’o esperiénsia pesoál katak “ha’u hanesan Poeta ida, ha’u buka meius lee barak, rona barak, para nune’e ha’u hakerek iha ni-nia pezu, iha ni-nia kualidade, ne’ebé ha’u nia esperiénsia pesoál durante ne’e, buka atu lee livru ne’ebé ho lian ne’ebé ha’u komprende, pur ezemplu ho lian Portugés, ho lian Indonézia, Inglés ho Tetun.”

Bernabe hatutan, atu labele haluha mos lian materna, tanba livru barak seidauk hakerek ho ita nia lian materna, maibé importante tanba ida ne’e prezerva ita nia kultura, Poeta Abe Barreto fahe nia esperiénsia pesoál konabá importánsia hosi lee no hakerek.

Ba vontade leitura nian, Poeta ne’e nia mensajen katak, iha aktividade ne’ebé liga kualker lian ida, “iha abilidade haat, rona, lee, hakerek no ko’alia. Haat ne’e hanesan refeisaun diária,” tanba ne’e presiza rona barak, lee barak, hakerek barak, hakerek iha surat-tahan, hakerek mos iha kakutak i ko’alia barak se kuandu tolu ne’e ita prátika barak ona, nune’e ko’alia barak iha nia isin ka iha pezu lia-fuan mak ita ko’alia.

Feira livru ho tema “O Livro é uma Janela para o Mundo”, implementa iha ámbitu loron komunidade CPLP nian, ne’ebé hala’o iha Jardin Palásiu Prezidensiál hosi loron 15 to’o loron 17 fulan Jullu tinan 2022. Objetivu husi eventu ne’e mak atu promove lingua ofisiál, promove vontade lee livru ba estudante sira, promove lasu amizade entre estudante husi eskola oi-oin no promove talentu estudante sira.

Print Friendly, PDF & Email

LEAVE A REPLY

Please enter your comment!
Please enter your name here