Reportajen David da Costa Gusmao
Autoridade Nasionál do Petróleo no Minerais (ANPM), desmente kuantidade kombustivel menus iha Timor Leste. Ho ida ne’e apela ba públiku labele pániku ho rumores ka boatus, kona-ba kombustivel menus iha armazein ho retallu sira.
Liu husi komunikadu imprensa ne’ebe Neon Metin asesu husi ANPM ohin kinta (28/07/2022), ANPM informa ba públiku katak fornesimentu (Stock) kombustivel (Gazolina no Gazoleo) iha armazein bo’ot rua hanesan Pertamina International Timor (PITSA) iha Praia dos Coqueiros no Esperanca Timor Oan (ETO) iha Hera sufisiente hela hodi bele atende nesesidade konsumidores iha Timor laran tomak.
ANPM mos hakarak informa katak oras ne’e dadaun Ró tula kombustivel atraka ona iha Ponte Kais Armanezen Kompañia PITSA nian no sei halo deskaregamanetu ohin loron kuantidade Gazolina hamutuk litru tokon 2 resin (2.494.372 litru) no Gazoleo tokon 1 resin (1.632.203 litru). Enkuantu ANPM sei konfirma kuantidade kombustivel iha Armazen Kompañia ETO nian, maske nune’e, kompañia ETO fo sai ona iha sira nia pájina media social katak sira iha reserva kuantidade nebe sufisiente.
“Kompañia PITSA no ETO hanesan distributor bo’ot rua iha Timor Leste sempre importa kombustivel tuir kalendariu importasaun nomos depende ba nesesidade iha rai laran. To’o agora laiha interupsaun ba kalendariu importasaun kombustivel,” Hatete iha komunikadu ne’e
Ho nune’e ANPM apela ba publiku katak atu la presiza paniku ho rumores ka boatus kona-ba kombustivel menus iha armazen ho retallu sira. Ho kolaborasaun diak tomak hamutuk ho importadores ho postu abatesementu kombustivel sira hotu ANPM sei garantia distribuisaun kombustivel iha merkadu ho efetivu no efikas.
Nune’e mós iha publikasaun pagina ofisial Esperanca Timor Oan (ETO) nian, husu ba publiku sira atu atu labele paniku sosa mina, tanba Eto iha garntia katak mini se sufrcentr ba ema hotu.
“Husu ba kliente hotu katak, lalika paniku Eto se garante katak stok mina seo sufecente ba ema hotu-hotu nia nesesidade no atividade diaria, ho nune’e Eto husu ba atu lalika paniku hodi sosa mina,” dehan iha pagina ofisial Eto Monving Energy ne’ebe Neon Metin Asesu ohin.
Entertantu tuir observasaun jornalista Neon Metin iha térenu katak, motorista sira hahú fiar ba informasaun sira hoax ka falsu ne’ebe lansa iha media sosial, hodi ba forma iha fatin ense mina no motorisa balun lori masa mamuk hodi ense mina, tanba fiar ba buatus ne’ebe dehan mina sei maran.