Reportajen Joselina dos Santos
NGO Belun husu ba lideransa Arte Marsiál, presiza halo sosializasaun, hodi fó atensaun ba membru sira atu labele hamosu bebeik konfrontu entre grupu arte marsiál sira iha rai laran no rai liur, tanba ne’e lideransa sira nia responsavel atu tau matan ba membru sira.
Hafoin aprezentasaun konaba rezultadu peskiza, Peskizador no Program Manager Atres Belun, Romaldo Caetano hateten arte marsiál la’os buat ne’ebe foun ba ita, tanba sempre akontese krime asalta no ataka malu to’o rezulta ema mate, no halo komunidade babain mak sai vítima.
“Liga ho aktu hirak ne’e, dalaruma inan aman ou labarik feto sira ne’ebe hakmatek iha nia fatin hetan mos konfrontu, tanba hatauk sira hodi hases a’an husi sira nia uma no labele halo movimentu entaun ida ne’e afeta ba komunidade nia moris”, dehan, Peskizador Romaldo Caetano iha Fundasaun Haburas, 27/07.
Nia dehan governu reativa fali arte marsiál atu kontrola ida-idak nia a’an, maibe ita la hatene sira nia reativa ne’e oinsa, ativa ba treinu ka oinsá, tanba daudaun ne’e iha Dili laran, sira komesa uza farda iha dalan, regulamemtu mak ida ne’ebe, bele reativa fali maibe tenke hatene uza farda ne’e iha fatin ne’ebe, laos uza arbiru.
“Maske governu kria servisu ba joven sira, mais falta koopera husi inan aman ba oan sira, entaun krime sira ne’e sei kontinua akontese tanba husik oan sira livre, aat liu dala ruma oan sira husu osan atu eskola, maibe oan husu osan ba sa’e sabuk, ne’e inan aman buka meius atu suporta oan sira, inklui lideransa arte marsial tanba la tau matan ba nia membru sira ikus tenke mosu konfrontu”, dehan nia
