Home Notisia PR Husu Partidu, Deputadus no Governu Tenke Kumpre Promesas Eleitoral nian

PR Husu Partidu, Deputadus no Governu Tenke Kumpre Promesas Eleitoral nian

495
0
Prezidente da Republika, Dr. Francisco Guterres Lu Olo. [Foto: Copyright Media PR | 20.03.2020]

Situasaun politika ne’ebe lao naruk iha rai laran, fo impaktu ba lalaok governasaun nian,hodi dezenvolve nasaun no povu ninia nesesidade, mosu diskusaun pro no kontra entre partidu politiku sira.

Iha loron tomada de posse ba membru governu nain 21, iha palacio prezidensia Ai-tarak laran, loron 24 Junhu, Prezidente da Republika, Dr. Francisco Guterres Lu Olo liu hosi deskursu hateten, dalabarak debate sira manas tebes, maibé importante mak haree oinsá hatuur beibeik relasaun respeitu ba malu, ho haraik-an atu bele hametin demokrasia ba beibeik.

Lu Olo hateten partidu polítiku sira-nia knaar mak buka entendimentu, atu  hametin maioria parlamentár ba beibeik, maibé partidu sira iha mós knaar importante seluk ida. Nudar partidu opozisaun ka partidu apoia governu,  partidu hotu-hotu tenke halo mós krítika konstrutiva ba asaun governativa.

Tuir Lu Olo vontade oovu nian liu hosi votu, mak fó lejitimidade ba propostas no lala’ok hosi partidu polítiku sira, ho asentu iha Parlamentu Nasionál.

Nune Prezidente Lu Olo hateten deputadu sira iha responsabilidade rua, hanesan defende saída mak  partidu polítiku  ida-idak nian hakarak, ida fali mak oinsá reprezenta Povu nia hakarak iha Parlamentu Nasionál. Ho responsabilidade sira ne’e, mak deputadu sira hala’o sira-nia knaar fiskalizasaun ba asaun governativa.

“Ita-nia Lei-Inan fó responsabilidade boot tebes ba partidu polítiku sira, no ba sira-nia lideransa. Ita tenke konxiente katak, ita-nia sidadaun  sira ezije hosi lideransa partidu sira-nian no hosi mós bankada parlamentár sira atu buka dalan, hodi harii no hametin ba beibeik  maioria parlamentár ida ne’ebé bele kaer-metin  governu to’o  mandatu nia rohan”, hateten Lu Olo, 24/06

Xefe Estadu ne’e fo mesajen ba lideransa partidu sira, katak presiza iha maturidade no bankada parlamentar sira, deputadu idak-idak tenke servisu, maka’as,  hodi bele kumpre promesa sira-ne’ebé hato’o iha kampaña eleitorál.

Sira tenke mós aten-barani atu hatán ba Povu kona-ba  saída  mak sira halo. Partidu polítiku sira labele sai de’it mákina hodi manán eleisaun. Tenke sai mós fatin hodi promove responsabilidade polítika no sívika, no  hasa’e  konxiénsia kona-ba sidadania.

Prezidente Lu Olo hateten partidu polítiku sira, deputadu sira no governu tenke fó sira-nia kontribuisaun, hodi kumpre promesa eleitorál sira no programa governu nian iha Lejizlatura ida ne’e.

Print Friendly, PDF & Email

LEAVE A REPLY

Please enter your comment!
Please enter your name here