Reportajen Joselina dos Santos
NGO Belun aprezenta rezultadu peskiza konaba Mekanizmu Rezolusaun Hodi Dispusta Nivel Komunidade iha municipiu Baucau, hodi hakbiit komunidade, nia parseiru sira inklui Rede ba Rai.
Hafoin aprezentasaun, Peskizadór Program Manager Atres Belun, Ronaldo Caetano hatete Belun halo aprezentasaun konaba rezultadu husi survey ne’ebe hala’o iha munisípiu Baucau, konaba mekanizmu rezolusaun konflitu, ne’ebe komunidade sira adopta iha sira nia fatin, atu nune’e resolve sira nia problema ka konflitu ne’ebe akontese iha sira nia leet.
“Liuhusi aprezentasaun ne’e atu hetan rekomendasaun no input husi maluk sira, oinsá bele adapta di’ak liu tan, hodi bele konsidera ba oin no bele hadi’a komunidade nia mekanizmu rezolusaun konflitu ho alternativu ne’ebe diak liu tan”, dehan, Peskizador Program Manager Atres Belun Romaldo Caetano hafoin aprezentasaun, iha Fundasaun Haburas, 27/07.
Romaldo informa tuir peskiza ne’ebe durante ne’e Belun deskobre katak, rezultadu ne’ebe sira hetan, katak numeru kazu liga ba Rai aumenta aas iha Timor-Leste 57%, Viólensia Doméstika 10%, no kazu Arte Marsial ho 1%.
“Ita hotu hatene katak kazu viólensia doméstika ne’e aumenta aas liu-liu ba iha munisipiu Liquisa Bobonaro, Covalima no RAEOA, iha ne’eba kazu dahuluk mak falta rekursu ka ekonomia ba entendimentu ba uma laran, ida ne’e akontese tanba governu la prepara kampu traballu, atu bele atende ba nesesidade komunidade hodi hetan osan”, nia salienta.
Nia dehan atu bele reduz violénsia doméstika, governu tenke kria kondisaun liu husi hola produtu lokál husi komunidade sira nian.
Nune’e Belun husu ba entidade hotu, atu bele ajud vítima sira husi kazu viólensia doméstika, tanba lei hatete katak, sé de’it mak hetan maibe la hato’o ba autoridade signifika nia mos kategoria hanesan naun-partisipasaun ba iha aktu violénsia dómestik,a entaun nia mos tenke kona pena ida.
