Reportajen Umbelina dos Reis
Deputada Bankada Kongressu Nasionál Rekonstrusaun Timorense (CNRT), Lucia Taeki husu governu halo manutensaun ba transporte marítima ne’ebé transporta povu Oe-cusse liu hosi Ro Berlin Ramelau, nune’e labele difikulta povu Oe-cusse nia viajen ba mai.
Deklarasaun ne’e Deputada Lucia hato’o iha uma fukun Parlamentu Nasional liuhusi plenária , bainhira halo diskusaun konaba Orsamentu Jeral Estadu 2023 (OJE).
Nia dehan ro Berlin Ramelau tinan ida ona, no presiza halo manutensaun, hodi nune’e bele fasilita viajen komunidade nian ba Oe-cusse.
“Ro Berlin Ramelau tinan ida ona mas governu presija atu halo manutensaun, se bainhira nia halo manutensaun tenke Ro ida mai troka, selae Nakroma bolu Ramelau hatan,” dehan Deputada Bankada CNRT Lucia Taeki liu husi nia intervensaun iha Debate OJE 2023 iha Uma Fukun Parlamentu Nasionál, Tersa 08/11.
Deputada ne’e mós husu Primeiru Ministru Taur Matan Ruak iha debate OJE ne’e konabá Ro Nakroma ne’ebé agora dadaun la para iha tasi laran oras ne’e da-dauk.
“Primeiru Ministru ha’u nia perguntas uluk sedauk hatan, agora ita debate tan ona Orsamentu Jerál Estadu 2023 konabá Ro Nakroma, agora Ro Nakroma tinan ida ona la para iha tasi laran la hatene ba ne’ebé?” Deputada Lucia kestiona.
Nia hatutan, tanba ita la tau atensaun ba manutensaun rutina mak bainhira Ro ne’e dodok ona mak ita foin atu tau osan, ne’e mak tinan ida ona iha Indonézia la mai.
“Ho nune’e ita hotu hanoin, ita bele hamnasa maibé Oe-cusse mós povu Timor-Leste, ida ne’e mak ita ko’alia fo parabens ba patraun ABI ne’ebé ho fuan no domin boot duni ba povu Oe-cusse RAEOA hodi hola Ro Susesu hodi atende netik povu Oe-cusse nia hakilar ba viajen kada tinan, kada semana no loro-loron, fo hanoin hela governu, ba ita hotu atu hanoin tau atensaun ba kondisaun ida ne’e,” nia preokupa.
