Reportajen Umbelina dos Reis
Relasiona ho protestu hosi Aliansa Maubere Nacional (AMN) ba proposta deputadu Parlamentu Nacional (PN), atu sosa kareta Pajero Sport no laptop foun, Vise segundu Parlamentu Nasional (PN), Luis Roberto da Silva hatete, sosa kareta foun ho laptop ba deputadu sira ne’e la’os impaktu boot ba dezenvolvimentu tan ne’e presiza duni transporte para atu halo servisu.
“Ha’u hanoin sosa kareta foun ne’e la’os impaktu bo’ot ida, ba órgaun soberanu ne’e presija duni transporte para atu halo servisu. Hakarak husu ba joventude sira hanesan universidade sira halo manifestasaun konabá dezenvolvimentu ida ne’e karik importante la’os halo manifestasaun fali ba Parlamentu Nasionál sosa kareta foun no laptop ou la sosa la’os ida ne’e sai fali impaktu boot ba dezenvolvimentu ne’e lae”, dehan Vise segundu PN Luis Robertu ba Jornalista sira iha resintu Parlamentu Nasional, Segunda, 07/11.
Nia Hatutan katak, argumentu saída de’it Parlamentu serve atu simu hodi hare sosa ka lae, tanba klaru tiha ona estudante sira halo mos iha razaun, karik dezenvolvimentu fizikamente iha terenu la’o lentu los depois sosa kareta hela de’it ida ne’e mos inpaktu ba iha ita nia fundus ne’e.
Nia hatete, kareta atu sosa ou la sosa depende ba deputadu lejislatura foun sira, tanba kareta ida agora ne’e sei di’ak hela. Nia hatutan, sidadaun hotu-hotu iha tantu juventude no entidade hotu-hotu iha Timor laran tomak iha direitu no dever hodi kontrola fundus hotu, nune’e sira mos iha direitu hodi fo hanoin ba Parlamentu Nasional wainhira hakarak sosa kareta foun 35 hodi tetu di-di’ak nesesáriu hodi sosa duni ka lae.
“Tanba sosa kareta ne’e estraga osan, hasai de’it osan sosa besi aat. Nesesidade báziku la la’o ona ne’e mos impaktu ba ema, nune’e juventude mos iha hanoin hodi halo manifestasaun ba ida ne’e,” nia afirma.
Iha Fatin hanesan Vise Meza Parlamentu Nasional, Maria Angelina Sarmento Lopes hatete, karreta Prado 35 ho laptop 30 ba Parlamentu Nasional ba mandatu lejistlatura foun laiha iha impaktu ba dezenvolvimentu Timor-Leste, tanba deputadu presiza kondisaun para uza hodi halo fiskalizasaun.
Tuir nia, kuandu povu halerik ba estrada aat, bee mos laiha, meza no kadeira iha eskola sira laiha, labarik sira tuur de’it iha rai, nune’e povu labele uza nia transporte rasik hodi hato’o keixa ba nia reprezentante sira iha uma fukun.
“Ha’u atu husu de’it kuandu eskola laiha kadeira, meza, kondisaun ladi’ak, bee mos laiha, se maka atu tun mai keixa iha Parlamentu Nasional ka Parlamentu Nasional maka halo fiskalizasaun hodi husu ba Governu hodi tau osan, ha’u hanoin sosa kareta ba deputadu sira ne’e laiha impaktu ida,” dehan deputada Angelina.
Nia hatutan, sosa transporte ne’e hanesan meius ida hodi fasilita deputadu sira, tanba iha mandatu konstituisionál hatete katak knaar Parlamentu Nasional iha hodi halo fiskalizasaun. “Atu halo fiskalizasaun povu la buka ami, ami maka buka povu, se kuandu transporte laiha oinsá maka ita hatene povu sira nia preokupasaun,” tenik Agelina.
Tanba ne’e Parlamentu Nasional sei mantein sosa kareta foun, públiku tenke hatene sosa kareta ba lejilativa foun sira ne’ebé maka tama iha tinan oin, tanba sira nia mandatu atu remata, nia afirma tan.
“Ami nia mandatu atu remata ona, sosa karreta ne’e ba lejislatura foun, signifika sira ne’ebé maka tama mai iha kondisaun hodi hala’o sira nia servisu, kompara ho ami sira ne’ebé tama iha tinan 2017, ha’u rasik kuandu tama iha PN uza ha’u nia karreta privadu durante fulan rua, depois maka fó kareta operasionál,” deputada Angelina hakotu.
Entretantu liuhusi demonstrasaun ne’ebe organiza husi Aliansa Maubere Nacional, husu tu lalika hola kareta foun, tanba povu nia nesidade importante liu duke kareta ba deputadu sira.
