Reportajen Joselina dos Santos
Organizasaun Civil Society Education Partnership (CSEP), nia observasaun nota katak durante prosesu kampaña professores sira sai hanesan autor importante hodi mobiliza masa husi fatin-fatin, hodi ba partisipa iha komisiu públiku ne’ebé hala’o husi Partidu polítiku sira. Ida ne’e signifika katak durante kampaña professores sira abandona sira nia serbisu hodi halo fali atividade Partidu polítiku nian no kontinua abandona estudante sira. Tanba ne’e ne’e, husu ba Komisaun Funsaun Públika atu fó sansaun disiplinar ba professores sira ne’ebé durante ne’e abandona serbisu la ho lisensa hodi partisipa iha atividade kampaña Partido nian.
Ofisial Advokasia CSEP Feliciano Soares hatete, Tinan 2023 núdar momentu ida importante tebes ba estadu de direitu demokratika de Timor-Leste RDTL, iha ne’ebé estadu sei organiza eleisaun parlamentar hodi hili governu foun atu kontinua lidera RDTL ba periodu 2023-2028 oin mai. Ida ne’e normalmente akontese hanesan nasaun ne’ebé opta sistema demokrasia sempre realiza regularmente tuir ordem konstituisional ne ebé vigor iha Timor Leste.
“Povo Timor-Leste konsidera ne’e núdar festa demokrasia tanbá sira bele iha oportunidade hodi ezerse sira nia direitu politiku hodi hili Partidu politiku ida ne’ebé sira espera katak, sei bele reprezenta sira hodi bele kontribui ba hadiak sira nia moris no sira nia futuru iha tinan lima mai tuir konstituisaun RDTL artigo 46 DIREITU BA PARTISIPASAUN IHA POLITIKA ne’ebé iha alinea ida hatete sidadaun hotu- hotu iha direitu atu partisipa, husi nia rasik liuhusi reprezentante ne ‘ ebé hili tuir demokrasia, ba vida politika no ba asuntu públiku nian iha rai laran”, dehan, Ofisial Advokasia CSEP Feliciano Soares, Iha Salaun FONGTIL Kaikoli, tersa 09/05.
Nia esplika, Violensia Verbal Partido bo’ot sira hanesan FRETILIN, CNRT no PLP durante kampaña hahú kedas iha dia 19 de Abril 2023 to’o presente data lider nasionál sira husi Partidu tolu ne’e sempre halo azitasaun ida ne’ebé nakonu ho insultus no trata malu entre lider sira hodi hatun malu deit durante kampaña . Ida ne’e sei la tulun eleitor sira atu bele hatene no kumpriende didiak programa, vizaun no misaun husi Partidu nian nune’e bele ajuda eleitór sira bele hili ho rasionál iha eleisaun 21 de Maio 2023 .
“Fatin ba kampaña komisiu públiku sira konsentra besik kedas iha eskola sira. Exemplo iha Munisipiu Ermera fatin ba kampaña komisiu públiku nian sentraliza entre Eskola Secundario Geral Nino Konis Santana-Gleno no EBC 10 de Abril 99 Gleno. Situasaun ida ne’e perturba tebes prosesu aprendisajen iha eskola rua ne’e no durante prosesu kampaña estudante sira labele atende aula tanbá situasaun estrundu no barulhu iha fatin kampaña. Hafoin kampaña Partido polítiku sira la kuidadu ambiente hodi husik hela lixu no foer sira iha fatin ba kampaña nian ne’ebé estraga imajen sidade nian no mós bele kria poluisaun no afeta ba saude komunidade nian,” tenik nia.
Nune’e bele mós, hisu ba CNE atu identifika fatin ba kampaña dok husi fatin ne’ebé besik eskola sira, nune’e bele nafatin asegura katak durante prosesu kampaña estudante sira la lakon sira nia direito atu asesu ba edukasaun ho diak no kualidade. Husu mos ba lider Partido polítiku sira, inan aman no familia sira atu labele autoriza labarik sir aba tuir atividade politika durante komisiu sira ne’ebé Partidu politiku sira halo no asegura nafatin labarik sira atu bele asesu ba eskola ho diak durante prosesu kampaña.
