Reportajen David da Costa
Governu Alemaña liu husi programa Servisu Alemaña Interkambiu Akadémiku ka iha lian inglés hanaran German Academic Exchange Service (DAAD)- Helmut-Schmidt scholarship oferese bolsa estudu ba estudante internasional sira husi nasaun ne’ebe iha dezenvolvimentu nia laran, inklui Timor-Leste atu halo kursu masterado iha Alemaña. Bolsa estudo refere globalmente kuñesidu ho naran Bolsa Estudo Masterado ba Polítika Públika no Boa Governasaun.
Aktual bolseira programa bolso estudo DAAD – Helmut-Schmidt, Josefina Pereira, hateten, objetivu husi programa refere mak atu fasilita estudante husi nasaun ne’ebe iha dezenvolvimentu nia laran hodi promove boa governasaun, demokrasia, no justisa sosiál iha sira nia rain. Ho prinsípiu boa governasaun, kandidatu kualifikadu sira bele konkore ba bolsarefere hodi kontinua sira nia kurso masteradu iha área direitu, ekonomia, siensia sosiál no polítika no administrasaun.
programa bolsa estudo DAAD – Helmut-Schmidt loke ba estudante internasional husi nasaun hamutuk 150, ne’ebe mai husi kontinente Ázia, Áfrika, Amerika Latina no Oriente Médio atu estuda iha universidade ho kualidade di’ak iha Alemaña. Bolsa estudo sei kobre propinas eskola, tratamentu mediku, fó insentivu ba transporte no insentivu kada fulan durante estuda iha universidade ho durasaun kurso mínimu tinan rua (2).
Josefina sente kontente tanba bele reprezenta Timor-Leste tinan ida ne’e hodi halo ninia kurso masterado iha Dezenvolvimentu no Governasaun iha Universidade iha Alemaña hamutuk ho estudante husi nasaun seluk hanesan Brazíl, Mexico, Nikaragua, India, Venezuela, Egipto, Pakistan, Uganda, Zimbabwe, Sri Lanka, Vietnam, Indonezia, Mongolia, Ghana, Tunisia, no seluk tan.
“Programa bolsa estudo DAAD – Helmut-Schmidt la’os de’it suporta ha’u iha parte akadémiku, maibé fó mos oportunidade mai ha’u hodi aprende no analiza perspektiva globál konabá dezenvolvimentu sosiál, polítika, no ekonomia. Ha’u agredese DAAD ba oportunidade furak ida ne’e no ha’u enkoraja aspirante akadémiku no futuru lideransa sira atu aplika ba bolso ida ne’e hodi mellora sira nia kuñesimentu iha área ne’ebe sira hakarak espesializa ba,” dehan bolseira Josefina Pereira, liuhusi WhatsApp ba Neon Metin iha Tersa 9/05.
Entertantu, Kritéroa ba aplikasaun bolsa estudu DAAD – Helmut-Schmidt mak aplikante sira tenke remata kursu lisensiatura iha area relevante, iha esperensia servisu relevante ho mínimu tinan rua (2), no abilidade di’ak iha lian Inglés no kompleta mos rekezitu sira tuir espetasaun programa refere.
Alende ne’e, aplikasaun ba programa DAAD – Helmut-Schmidt tinan 2024 hahú loke ona ba públiku no sei taka iha fulan Jullu 31 de 2023. Kandidatu sira ne’ebe mak interese bele aplika online liu husi DAAD nia portal hodi submete sira nia aplikasaun, inklui formuláriu aplikasaun, CV/rezume, karta rekomendasaun, karta motivasaun ka deklarasaun propózitu aliña ho sira nia kualifikasaun akadémiku no kareira profesionál.
Nune’e, Atu hatene informasaun detallu konabá programa bolsa estudu DAAD – Helmut-Schmidt no prosesu oinsá atu aplika, favór rejista ba webinar online ne’ebe sei realiza aban, Kuarta-Feira, 10 Maio, tuku 04:30 to’o 05:30 loraik Otl. Ba informasaun detallu bele vizita mos DAAD nia website: https://scholarshipscorner.website/daad-helmut-schmidt-programme
