Reportazen Zevonia Vieira
Ministeriu Saude (MS) deteta tan kazu foun konfirmadu COVID-19 total 28, iha Dili deteta nain 26 no iha Baucau kazu foun nain 2.
Liu hosi zoom press conference, Koordenador Forsa-Tarefa ba Prevensaun no Mitigasaun Surtu COVID-19 iha Timor Leste, Dr. Rui Maria de Araújo relata ba jornalista sira katak ohin loron 27 Marsu 2021, evolusaun surtu COVID-19 iha municipio Dili, deteta kazu foun 26, nune’e kazu detetadu ka pozitivu iha Munisipiu Dili husi loron 7 Marsu 2021, to’o ohin loron 27 Marsu 2021, hamutuk 318.
Kazu detetadu 318 iha Dili fahe ba cluster 52, namkari iha instituisaun 4, eventu 1 & fatin kuarentena 2, suku 16, iha Postu Administrativu D. Aleixo, Vera Cruz, Nain Feto & Cristo Rei.
Nune’e dadus jeral ba loron 27 Marsu kazu foun total 28, kazu rekuperadu nain 2 no total kazu ativu hamutuk 324.Husi kazu foun nain 28 ohin, iha mane nain 15, feto nain 13, ema sintomátiku-lijeiru nain 4. Ema asintomátiku nain 24.
Husi horiseik mai ohin hamutuk hotu halo teste PCR total 611, inklui ona iha laran 252 ne’ebé mai husi pedidu autorizasaun esepsionál, atu sai husi serka sanitária iha Munisipiu Dili hamutuk nain 5.
