Reportajen Agustinha Amaral
Prezidente Uniaun Agrikultura Ermera (UNAER), Alberto Martins hateten, UNAER hamriik husi kazu rai, ne’ebé liga ho tempu Portuguesa nia duminasaun rai iha Ermera iha tinan 2001, depois de ukun aan hanoin oinsá asegura to’os na’in sira atu asesu fila-fali ba bei-ala sira nia moris fatin ka liman fatin iha sira nia rai, husi ne’e mak sira harii Uniaun Agrikultura atu ko’alia liu ba justisa direitu ema na’in lolos ba rai.
“Harii tiha Uniaun ne’e, ami hamosu kongresu Uniaun iha rua, ida mak politik reforma total atu kompleta polítika dezenvolvimentu agrikultura sustentável, ko’alia ba polítika reforma total atu kompletu nia objetivu katak atu foti rai plantasaun sira, reforma rai atu fahe ba komunidade sira depois komunidade sira hetan tiha rai, saída mak komunidade sira halo tenki iha fali formasaun ida tama iha pakote ida bolu politik dezenvolvimentu agrikultura sustentável, ita prepara to’os na’in sira hodi hela iha area plantasaun ne’e”, dehan Alberto ba Neon Metin iha edifísiu Haburas, Farol, tersa, 19/12.
Nia haktuir, iha koñesimentu bele maneza rai ne’e, bele halo produsaun hodi hasa’e produsaun, primeiru hahú ho harii viveirus, fo formasaun ba komunidade sira hodi hatene objektivu hari viveirus ne’e, kompozisaun husi rai metan, rai henek no ita identifika fini ne’ebé di’ak hodi tau ba viveirus.
“Ami ba fali formasaun ida naran uzar integradu ba ema to’os na’in sira atu nune’e formasaun ba baze hotu-hotu. Formasaun teknik, tuir fali mai formasaun ba pratik to’os na’in sira oinsá koñese atu kuda rai ne’e,” dehan Nia.
Nia salienta, depois udan tuun iha dezembru, janeiro tama fali ba kuda ai-horis sira tanba ne’e labele han tempu hanesan bei-ala sira uluk kuda malus, ita tenki muda kuda fali pimenta tanba ita hatene pimenta kilo ida $12 dolar ho meius ida atu fo responde ba uluk ita nia eis Primeiru-Ministru ko’alia katak Ermera riku fulan tolu, kiak fulan sia.
