Reportajen Adroaldo ‘Saretukau’ & David da C. Gusmão
Ekipa susesu kandidatu Prezidente Repúblika, Dr. Francisco Guterres “Lu-Olo” liu hosi komunikadu imprensa iha sede nasionál Luz Clarita (12/03), nafatin protesta desizaun CNE ba utiliza media privada GMNTV no nia moderadór Expedito Dias, sai host ba debate entre kandidatu Prezidente Repúblika na’in 16, maski ekipa susesu hetan ona resposta hosi CNE rasik.
Tuir porta-voz kandidatu Francisco Guterres “Lu-Olo”, Fernando Gusmão hateten la satisfás ho resposta ne’ebé CNE hato’o ba sira, tanba ne’e sira nafatin kestiona no husu atu di’ak liu hala’o debate kandidatu PR iha kanal RTLL.EP.
“CNE mos la iha transparénsia ba iha kustu ne’ebé mak atu aloka ba iha debate kandidatu Prezidente sira nian. Resposta ne’ebé sira fo ba ami, sira hatete de’it katak selu ba GMNTV $12,000 ba kobertura ni-nian, ba hala’o programa, mais la esplika kustu ba aluga otel hira, ba movimentu ekipamentu ne’e hira, ne’e sira la esplika klaru. Entaun iha ne’e hatudu katak, la iha transparánsia ba utilizasaun fundus públikus ni-nian,” dehan porta-voz Fernando iha sede nasional kandidatu PR Francisco Guterres, Luz Clarita, Sábadu, 12/03.
Nia hatutan tanba ne’e mak sira nafatin kestiona tanba ida uza osan povu nian tenki klaru, uza ba saída no nia montante hira. “Ami mos husu ba komisauna anti korupsaun para atu akompaña situasaun ida ne’e, bele halo mos investigasaun tanba saída mak RTTL ne’ebé oferese kustu baratu liu, los duni sira husu $24,000 maibé ne’e ba item bar-barak,” dehan Fernando.
Nia dehan ida ne’e hanesan ita nia preokupasaun katak CNE mos lakoi uza media públiku ne’ebé kapas iha sira nia kobertura, ne’ebé bele kobre Timor laran tomak. Liu hosi komunikadu imprensa ne’e, sira kestiona mos CNE ne’ebé nia desizaun hodi nomeia Espedito Dias sai nu’udar moderador ba debate kandidatu Prezidente Repúblika nian ne’e, tanba tuir sira nia haree, GMNTV nia kobertura no programa sira ne’ebé Expedito Dias lidera la hatudu imparsialidade.
“Ami kontinua husu ba CNE atu nomeia ema seluk, di’ak liu nomeia ema, por ezemplu ema akadémika, tanba sira iha liu imparsialidade, sira onestu liu para atu sai moderadór ba debate kandidatu sira,” kestiona Fernando.
Iha parte sorin ba kestinamentu ekipa susesu kandidatu PR “Lu-Olo” ba utilizasaun media privada GMNTV, via telefone ba Neon Metin, Prezidente CNE, José Agostinho Belo dehan, CNE hili GMNTV, tanba prosesu ne’e liu hosi kuotasaun no haree ba televizaun ne’ebé iha kualidade di’ak.
“Ne’e la’ós polítika, ne’e prosedur administrasaun nian, sé mak manan, la manan ne’e kuotasaun, agora nusá mak nia ba kestiona fali ida ne’e, ida ne’e tékniku sira mak hatene, nia la manan meman ni-nian kualidade, buat sira ne’ebé la bele, ne’e atu fó manan hanusa, tolu kedas, se maka di’ak maka manan,” esplika nia Prezidente CNE liu hosi kontaktu telemóvel.
Entretantu Prezidente CNE hatutan kotasaun ne’e CNE halo ba telvizasaun tolu, RTTL.EP, GMNTV no TVE. Prosedura sira hotu liu husi administrativu CNE nian.
