Reportajen Santina Lucia da Costa
Konsellu Imprensa Timor-Leste (KI), realiza konferénsia imprensa kona-ba Prezidente KI, Virgílio da Silva Guterres “Lamukan” deklara nia dispensa (lisensa) husi ezersísiu ba funsaun sira no delegasaun kompeténsia Prezidente KI. Nune’e Prezidente KI indika Konselleiru Expedito Loro Dias Ximenes interinamente Subtitui Virgilio da Silva Guterres, durante fulan 3.
Virgilio da Silva Guterres “Lamukan” husu pedidu dispensa husi ezersiu ba funsaun, tanba ho razaun atu kompete iha eleisaun Prezidensial tinan 2022 nian, Prezidente KI ne’e mós nu’udar kandidatura ida, ho nune’e halo desizaun tuir direitu konstituisaun iha artigo 75 kona-ba elejibilidade ba kandidatu Prezidente Republika.
“Konferénsia imprensa ne’e iha objetivu maka, hato’o ba públiku hahu ohin ba to’o Abril eleisaun hotu, hau sei despensa hau nia funsaun hanesan Prezidente Konsellu Imprensa , tanba lei eleitorál hateten katak, kandidatu se de’it kaer kargu públiku, privadu, nia iha direitu ba dispensa husi nia funsaun. Durante hau hala’o knar hanesan Konsellu Imprensa, hau pronunsia hau nia kandidata-an ba Prezidente Republika, hau tenki husik hau nia funsaun hanesan Prezidente KI.” Hateten Virgilio da Silva Guterres “Lamukan” iha Konferensia imprensa iha Salaun KI, Quital-Boot, 24/1.
Lamukan dehan Lei komunikasaun sosial, estatutu KI mos hateten katak, bainhira Prezidente KI auzente ka impendente ruma, nia tenke nomeia no indika konselleiru sira seluk atu kontinua hala’o funsaun Prezidente KI ninian.
“Iha Períodu hau nia auzensia nian, hanesan haktuir iha numeru 2, artigo 24, Dkreto lei numeru 25/2015, 5 Agosto, Estatuto konsellu Imprensa no artigo 10 regulamentu konsellu imprensa, numeru 1/2021/ 26 Fevereiru, Funcionamento plenario do Conselho Imprensa e subtituisaun do Prezidente, hau hatudu (indika), Konselleiru Expedito Loro Ximenes, nia atu interinamente subtitui hau hodi hala’o knar sira nu’udar Prezidente KI nian, hahú husi loron 24 Janeiru to’o 24 Abril 2022.” Hateten, Lamukan.
Durante Periodu refere, Expedito Loro Dias Ximenes sei hala’o knar nu’udar Prezidente Interinu Konsellu Imprensa ho kompetensia tomak ne’ebé haktuir iha númeru 1, artigu 24. Dekreto Lei No. 24/2015 5 Agostu, estatuto Konsellu Imprensa.
