Reportajen Umbelina dos Reis
CEPAD ho Uniaun Europeia (UE) lansa manual sidadaun dahuluk, hodi suporta komunidade nia asesu ba informasaun, liu-liu feto hodi asesu informasaun relevante ho kle’an, hodi suporta sira foti desizaun, ne’ebé afeta sira nia moris hanesan edukasaun, saúde no rekursu selun tan.
Manual ida ne’e kria liu hosi finansiamentu Uniaun Europeia ba inisiativa ‘asegura responsabilidade governu nian ba Covid-19 no promove liberdade asesu ba informasaun iha Timor-Leste. Projetu ne’e hala’o ba tinan rua (2020-2022), implementa hosi CEPAD.
Objetivu projetu ida ne’e mak atu fasilita sidadaun sira hodi asesu ba informasaun ne’ebé rai iha instituisaun estadu nu’udar sira nia direitu konstitusional ba informasaun, no ojetivu prinsipal mak promove no hakbiit koñesimentu sidadaun, partikularmente feto sira nia direitu atu hatene no asesu informasaun ne’ebé relevante hodi suporta sira nia moris liu hosi asesu ba edukasaun ida ho kualidade, fasildade saúde no rekursus seluk tan.
“Asesu ba informasaun mak forsa xave ba dezenvolvimentu. Uniaun Europeia hakarak suporta governu Timor-Leste liu husi meius oi-oin inklui suporta organizasaun sosiedade sivíl hanesan CEPAD. Timoroan bele asesu ba informasaun la’os de’it atu hatene sira nia direitu maibé mos iha koñesimentu kle’an nune’e foti dezisaun sira informadu di’ak liu tan no monitoriza situasaun ne’ebé afeta ba sira nia moris,” hateten Embaixador UE, Andrew Jacobs, iha Hotel Novu Turizmu, 05/07.
Eventu aprezentasaun rezultadu implementasaun programa no lansamentu ofisial ba manual sidadaun hamutuk ho S.E Primeiru Ministru, Embaixador UE, Ministru MAPKOMS, reprezentante grupu Traballu Nasional Liberdade Asesu ba Informasaun CEPAD, fokal point iha nível lokal no reprezentante komunidade no servidor públiku hosi munisípiu 12 inklui RAEOA.
Liu hosi UE nian, CEPAD hala’o ona sesaun no utiliza sidadaun hodi fasilita diskusaun ho komunidade sira iha postu administrativu 32 iha munisipiu 12 inklui RAEOA, ne’ebé partisipa hosi komunidade hamutuk 486 (feto 370 no mane 116) iha tinan 2021. CEPAD mak Organizasaun naun governamental, estabelese hodi responde ba krize sósiu polítika iha tinan 2006. CEPAD nia misaun mak uza peskiza kolaborativu no diálogu ba hasa’e komprensaun konabá asuntu konflitu no dezafius konsolidasaun ba demokrásia no direitus umanus.
