Home Feature SS Fo Todan Ba Motorista Francisco: Hau nia Forsa La Liu Nain...

SS Fo Todan Ba Motorista Francisco: Hau nia Forsa La Liu Nain Ulun Sira

339
0
Motorista karet Angguna, Francisco A.Baros. [Foto: Joselina | 13.05.2021]

Reportazen Joselina dos Santos

“Ha’u nia forsa la liu nain ulun sira, tanba ne’e ha’u hakarak soe piadas de’it katak ami povu ki’ik ne’e governu nia oan, karik governu sei hanoin hetan hanesan bee debu ida karik, labele tau ikan maran tau iha bee laran”. Francisco

Surtu COVID-19 laos ameasa deit ema nia saude liu-liu ba ema sira ne’ebe laiha imunidade diak, maibe surtu ne’e rasik hamosu problema sosial liu-liu ba ema kbiit laek sira. Iha parte sorin governu luta hodi kombate COVID-19, husu ba komunidade hotu atu tuir protokolu saude, kria lei sira ne’ebe atu redus movimentu ema nian iha liur, nune’e la hadaet SARS-CoV-2 ba ema seluk, maibe ida ne’e implika tebes ba moris sosial nian.

Fulan ida liu ona transporte publiku sira labele lao hodi buka pasajeiro, situasaun ne’e halo motorista sira mos tenke lakon rendimentu, tanba balun serbisu ba nain hosi transporte hirak ne’e. Neon Metin konsege dadalia ho motorista karet Angguna, Francisco A.Baros ne’ebe halo movimentu hosi Dili ba Maubisse, maibe serka sanitaria (SS) no konfinamentu obrigatoriu obriga nia tenke hela iha uma no ikus nia hasoru susar, atu hakbiit nia an hodi hatutan moris ho nia familia.

“Durante ne’e, ha’u nia moris mak hanesan motorista,  mais agora iha tempu serka sanitaria, estaduemerjensia no konfinamentu obrigatoriu ema hotu iha uma,  entaun buat ida forma familia ne’e ami mane mak responsabilidade bo’ot ba fen oan no famila, tanba sira garantia ba ha’u karik iha familia mak la’os mane mak responsabilidade singifika ne’e la’os keluarga, mais kasihan tanba dalan taka, laiha dalan seluk atu hetan rendimentu,” dehan Francisco ba Neon Metin, iha Kaikoli 09/05.

Francisco haktuir nu’udar xefe familia iha responsabilidade ba familia uma laran, senti triste tebes ba situasaun ne’e tanba atu hakat ba oin no hakat ba kotuk ladia’k, Franciso ko’alia ho matan wen iha matan laran.

“Karik governu iha hanoin, ajuda netik ami povu ki’ik sira ne’ebe mak hanoin la to’o, kona-ba implementasaun serka sanitaria ne’e ami hanoin barak liu, entaun oinsa ho governu nia planu kona-ba ida ne’e, tanba nu’udar motorista ha’u hanoin barak ona, sa tan maluk sira ne’ebe mak laiha skiil la hanesan ho ha’u, kuitadu loron kalan maka tur hanoin ho matan wen de’it,” dehan Franciso nakonu ho triste

Xefe familia ne’e konfesa tan ba Neon Metin katak antes serka sanitaria nudar motorista anggunan husi Dili ba Maubessi no loron id abele hetan rendimentu hosi $30-$50 dollar. Ba Neon Metin nia dehan hakarak buka dalan seluk hodi buka osan nune’e bele sustenta uma laran, maibe susar tebes, tanba tenke kumpri implementasaun serka sanitaria.

Francisco hahu preokupa sekarik serka sanitaria ne’e kontinua nafatin, sei fo todan liutan ba nia moris no familia, tanba Franciso iha oan nain haat, no iha nia uma rasik familia hamutuk ema nain 9 mak hela.

“Ha’u nia forsa la liu nain ulun sira, tanba ne’e ha’u hakarak soe piadas de’it katak ami povu ki’ik ne’e governu nia oan, karik governu sei hanoin hetan hanesan bee debu ida karik, labele tau ikan maran tau iha bee laran”, tenik Francisco.

Francisco iha esperansa boot ba situasaun ne’e atu fila fali normal, nune kontinua buka osan. Situasuan ne’e sai preokupasaun ema hotu nian, iha parte ida governu hamutuk ho nia povu hamutuk hodi luta kontra COVID, maibe oinsa luta hamutuk ho povu kbiit laek sira atu la sai kiak liutan iha situasuan pandemia ne’e?

Print Friendly, PDF & Email

LEAVE A REPLY

Please enter your comment!
Please enter your name here