Reportazen Francisco JDA
Numeru COVID-19 iha Dili ne’ebe kontinua sae, nune’e governu kontinua desidi extende Serka Sanitaria (SS) no Konfinamentu Obrigatoriu iha Dili, fo impaktu ba moris sosial liu-liu ba maluk sira ne’ebe laiha kbiit naton, hodi hatutan moris.
Iha loron 12 Maiu, motorista taxi sira ne’ebe labele halao sira nia serbisu, hakat ba Posko Solidariedade Haburas-Farol hodi husu tulun ruma, liu-liu nesesidade baziku, tanba ba sira hahan komesa menus, tanba kbiit laiha atu hola iha merkadu ka loza. Taxista hamutuk nain 11 mak husu tulun ba Posko Haburas hodi hetan apoiu ai-han
Neon Metin halo entrevista ho reprezentante taxista iha Posko Solidariedade Haburas, Honorio Monteiro tenik katak bainhira hahu serka sanitaria iha 2020 konsege ba registu iha seguransa sosial, no loke konta bankaria, maibé estadu hanesan promete de’it no to’o agora la iha, se hanesan ne’e motorista mak la lori transporte publiku araska tanba depende ba movimentu, se la iha movimentu labele hetan osan atu sosa ai-han sira ba uma laran, inklui nesesidade labarik nian.
“Ami motorista senti araska bainhira kuandu la halai kareta, se ami la halai semana to’o fulan ne’e araska tebes, la iha osan hodi hola ai-han, hodi sustenta familia uma laran, maske estadu foti desizaun maibé la hare ba povu kiik nia susar no terus, promete mak barak maibé la hatudu realidade, estadu emergencia kleur ona, ami presisa estadu apoio hahán, no fasilita netik ha’u nia oan ne’ebé eskola iha swasta, tanba kada fulan ami selu nafatin, se kareta la halai lori saida mak atu selu oan sira nia eskola ka presiza,” konfesa Honorio Monteiro, iha Sede Posko Haburas Farol, 12/05.
Nia dehan preokupa tebes ho situasaun ne’e, maibe sente haksolok oituan tanba posku Haburas fo ona apoiu ai-han oituan no hatoo agradese wain ba posko Haburas Farol
Iha fatin hanesan Koordenador Posko Soliedariedade Haburas Farol, Pedro Hortencio Vieira ba Neon Metin hateten katak, realidade ne’ebé hatudu taxista sira terus kleur ona, tanba labele halo operasaun, nune’e bainhira Posku Haburas halo survey, nota katak bairo barak la hetan apoio ai-han ruma, hatudu katak krize ai-han ne’e la’ós iha loron 4 Abríl deit, maibé hahú kedas hosi estadu emergensia, entaun nia impaktu ne’e kleur ona, liu-liu ba motorista taxista no mikrolet no trabalhador sira seluk. Bainhira akontese indundasaun ema hotu foku ba iha indusaun, maibé sira ne’ebé mak hamlaha antes inunduasaun la hetan.
“Ami hasoru sira, maibe posko nia kemampuan mak oituan de’it ona, entaun Posko prepara fos saka 11, mais lolos posko hare ba inundasaun iha loron 4 Abril, maibé ema barak mak terus, la’ós de’it afeta hosi indundasaun, sira mak la efeta indundasaun ne’e terus barak ona besik tinan ida, tanba Posko nia kbiit limitadu, se ema ajuda sasán no tulun tan posko entaun ami sei tau matan mós ba taxista sira,” hateten Koordenador Posko Soliedariedade Haburas Farol.
Koordenador Posko Soliedariedade Haburas ne’e afirma tan, buat ne’ebé motiva Posko mak tenki fó apoiu ba ema hotu, maibé lao ho estratejiku no identifika ema lolos, no fó apoio tanba tulun hotu mak iha ema la dun kontrola no monitoring ema sira ne’ebé hetan ona, kontinua hetan nafatin ida ne’e hatudu katak la dun justu ba ema terus seluk, maibe bainhira Posko Haburas fo apoio ba taxista sira sente kontente.
Tuir dadus ne’ebé Posku Soliedariedade Haburas akumula, ema ne’ebe hetan ona apoiu hamutuk 7000 resin inklui mós taxista balun, maibé Posko Soliedariedade Haburas nafatin iha korajen, atu apoio ba hirak ne’ebe terus kleur ona, nune’e espera katak ema ajuda posku entaun kontinua tulun no fó apoio ba ema sira ne’ebé susar tebes ba nesesidade ai-han nian.
