Reportajen Filomena da Conceição
Relatoriu survey husi Alumni Parlamentu Foinsa’e Timor-Leste (APFTL), konaba partisipasaun iha politika, liu-liu iha eleisaun Parlamentár tinan ida ne’e, hatudu katak joven sira hili liu Partidu CNRT ho 37,9% FRETILIN 28,5%, PD 18,3 %, KHUNTHO 5,7 % no restante 7,6%.
Presidente APFTL, Zaulino Gomes da Silva hateten APFTL iha tinan ida ne’e, deside liuhusi asembleia reuniaun jerál 2023 hodi halo atividade survey kona-ba joven sira-nia partisipasaun iha vida polítika, ho nune rezultadu survey foku liu ba grupu sira ne’ebé ho idade 17-35 signifika la’ós ba ema hotu-hotu.
Nia dehan APFTL deside halo survey ho intensaun atu buka hatene saida mak halo joven sira-nia partisipasaun iha vida polítika. Aleinde ne’e APFTL mós halo sondajen ba sira-nia preferénsia, atu hili partidu polítiku iha eleisaun ida agora. Survey ne’e inisiativa husi APFTL rasik no la hetan apoiu husi instituisaun Estadu, tantu ajénsia nasionál no internasionál ka husi partidu polítiku sira, tanba atu garante rezultadu ne’ebé ho objetividade katak la hetan apoiu husi ema.
“Ami garante katak rezultadu ida ne’e bele hamosu insatisfasaun ba partidu polítiku sira maibé nu’udar organizasaun juventude brani públika tanba ida ne’e mai husi joven sira-nia hanoin no interese rasik. Ami halo ida ne’e tanba partisipasaun joven sira-nia iha polítika ne’e importante liu-liu ba ita nia Estadu, entaun preokupasaun no interese joven sira mak tenke konsiderasaun husi ema makaer ukun sira. Entaun lider sira presiza rona joven sira-nia hanoin no no sira-nia prioritiza atu nune’e bele hatene sira nian prioridade ba Governasaun tuir mai saida maka atu halo” Dehan Zaulino ba Jornalista sira iha Sede APFTL Becora, 18/04.
Nia esplika métodu ne’ebé APFTL uza hodi halo peskiza maka liu husi entrevista semi-estruturadu ba Joven hamutuk 350 iha fulan FeVereiru to’o Abril husi Munisípiu 11, no la inklui Munisipiu Atauro, Oe-cusse no Manufahi, ho razaun tanba menus orsamentu no distánsia. Aleinde ne’e maneira hili respondente mak amostrajen, asidentál no distribuisaun idade mak 17-35 no idade média respondente maka 24 liuhusi distribuisaun joven mane 56%, feto 40% bináriu katak la deside feto no mane 4% .
Nia salienta lihuhusi survey ida ne’e hatudu katak Joven sira-nia preferénsia ba asuntu maka governu sira presiza prioritiza ba asuntu edukasaun, infraestrutura, saúde, ekonómia, no kampu de traballu ba joven sira. Alende ne’e joven sira la aseita fó dolar $4.00 kada votu ba partidu polítiku sira hafoin eleisaun. Nune’e mós razaun joven sira hili partidu mak primeiru hateke liu ba figura, segundu vizaun no ikus liu istória.
Entretatu Bazeia ba dadaus ne’ebé APFTL rekoilla iha 11 Munisípiu rezultadu hatudu katak Joven sira hili liu partidu CNRT ho totál 37,89% , FRETILIN 28, 5% , PD 18, 3 %, KHUNTHO 5, 7 % no restante 7’6%.
