Reportajen Adroaldo “Saretukau”
Estudante Germano no Joãosito hela iha dormitóriu iha Kampus Lahane, hetan intimidasaun no amesa atu hetan oho hosi Diretor Departamentu Escola Superior Tecnologia e Saúde (ESTeS), Fakuldade Medisina Siénsia Saúde, UNTL, Miguel Soares, uanhira krítika no la satisfas ho desizaun Diretor nian konabá suku farda eskola nian, tanba folin ne’ebé karun.
Problema ne’e mosu konabá farda eskola estudante foun nian. Ba estudante foun nian farda, sira deskonfia Diretor hetan subornu.
“Asosiasaun koko halo intervein hodi buka alfaiate foun hodi bele suku estudante foun ninia farda. Tanba alfaiate anterior la reflete ba kondisaun estudante, maibé diretor defende ida ne’e, hakarak maintein ho alfaiate anterior, ho folin ne’ebé la refleta ba estudante.”
Tanba tuir sira estudante barak mak eskola, la’os de’it ema boot nia oan maibé povu aileba no agrikultor nian oan mos barak eskola iha ne’e, nune’e sira hakarak buka ida ne’ebé baratu maibé mos kualidade.
Sira hasoru hasoru Diretor hodi ko’alia asuntu ne’ebé maibé Diretor diskorda hotu sira nian hanoin sira, maske sira hakarak kontribui ba Fakuldade nia di’ak.
“Ho nune’e iha loron Domingo, 6 de Abril, bainhira ami mai uma leten (uma kampus nian) ami tuur hela, Diretor tama ba ho ameasa ida ne’ebé mak hakarak atu oho, ami na’in rua, ha’u ho kolega (Joãosito), depois la’os ida ne’e de’it maibé hakarak oho mos família hotu, ho ida ne’e mak ita la simu, tanba hanesan Diretor, la merese para ita prátika aktus sira hanesan ne’e iha Kampus.” Germano konta.
Nia dehan, sira prosesa ona kazu ne’e to’o ba reitor maibé seidauk iha resposta.
Nune’e mos estudante Joãosito, ko’alia hanesan saída mak nia kolega Germano konta, katak sira la konkorda ho folin farda iha alfaiate ne’ebé Diretor sujere, tanba folin karun liu, sira husu Diretor atu buka alfaiate ne’ebé ho folin baratu maibé kualidade mos, maibé ho sira nian asaun ne’e rejulta fali Diretor nia ameasa ba sira.
“Karik reitor la rezolve, ami sei lori kazu ne’e ba oin.” Dehan Joãosito.
Ronaldo José Galucho Prezidente Ezekutivu Asosiasaun Eatudantil, Fakuldade Medisina Siénsia Saúde, hatete, sira halo aproximasaun dala hira ho Diretor, la konsege iha resposta, até tanba estudante na’in rua hetan ameasa hosi Diretor entaun sira hato’o ba ninia superior ierárkiku Fakuldade Medisina Siénsia Saúde, lederadu hosi Dignísima Dekana.
Nia hatutan, sira keixa ona maibé seidauk hetan nafatin resposta, entaun sira sei halo tan karta ida ba Magnífiku Reitor para bele solusiona problema ida ne’e imediata.
“Asaun ida ne’e ami nafatin kontinua, karik laiha nafatin resposta, ami sei hato’o keixa ba evidénsia ne’ebé ami iha ba parte kompetente.” Dehan Nia.
