Reportajen Adroaldo “Saretukau”
Provedor dos Direitos Humanos e Justiça, Virgilio da Silva Guterres, orienta ona nia ekipa fiskalizasaun no monitorizasaun atu kontaktu delegasaun teritorial iha Oe-Cusse atu halo averiguação (konfirma) los duni ka lae Unidade Polísia Fronteira (UPF), kaptura no tortura sidadaun Cosmas Olin iha Naktuka, RAEOA.
Sorin seluk, Media Online Neon Metin kontaktu no konfirma direita ona vítima Cosmas Olin katak nia hetan duni baku. Notisia ne’ebé Neon Metin Publika iha 29 Abril, 2025 ho nia títulu “UPF Nain-10 Baku Lisuk Ativista Komunitaria Cosmas Olin Iha Naktuka, PNTL Nega”.
Maske nune’e, Provedor la fó informasaun ruma liga ho asuntu ne’e tanba sira-nia ofisiais sei buka hela informasaun.
“Ami hein katak la akontese, hein katak saída mak ita rona, informasaun sira ne’ebé ke to’o mai neé, la loos, katak laiha kapturasaun, laiha agresaun fízika, ne’ebé polísia sira halo.” Dehan Provedor Virgilio iha konferénsia imprensa PDHJ, iha Edifício Caicoli, kuarta, 30/04.
“Mas se iha, ida ne’e preokupasaun boot, tuir ha’u agresaun fíziku hanesan ne’e, ita hotu-hotu kondena, Provedor rasik kondena hahalok hanesan ne’e.” Nia preokupa.
Nia hatete, kazu ne’e atu hanesan mak akontese iha munisípiu Viqueque, iha ne’ebé Ofisial Polísia baku lisuk sidadaun ida. No ba kazu Cosmas Olin, karik tebes, husu atu hato’o keixa.
“Komisáriu Jeral hato’o katak, komunika hela ho Komandu UPF, atu mos averigua situasaun ne’e. Di’ak tanba Komisáriu jeral mos enkoraja família ka maluk ne’ebé sai vítima ba agresaun fízika ne’e, bele hato’o keixa ba Komandu Polísia ninian ou entidade sira seluk, atu nune’e sujeita ba prosesu investigasaun ruma.” Provedor hatete, komunika informalmente ona ba Komisáriu Jeral PNTL.
PDHJ kontinua apela ba autoridade seguransa hotu iha munisípiu no mos UPF, tenki respeita dignidade ema ida nian, uainhira atu hola medidas ruma ka halo intervensaun sira.
“Kontinua tau kódigu konduta profisional Polísia nian hanesan referénsia ba sira nia intervensaun. Lei regula Polísia sira ne’e mai bazeia ba artigu 147 Konstituisaun da Repúblika, ne’ebé hatete iha ne’ebá katak, kualker prevensaun ba krime, deve respeitar Direitos Umanos.”
