Reportazen Joanina Casemiro
“La iha ema ida mak obriga hau, maibe ne’e hau nia hakarak duni, atu nune bele hado’ok a’an husi moras ida ne’e, tanba hanesa ami mane moras ne’e bele da’et lalais tanba ami fuma, fahe sigaru ba malu, hemu tuah hamutuk entaun moras ne’e bele da’et lalais entaun diak liu husi vasina bele preneve-an ami nia isin”. Bonifasio.
Komunidade Aldeia 01 Centro Unidade, suku Kaikoli, Posto Adiministrativu Vera Cruz, Municipiu Dili halao ona vasina COVID-19 AstraZeneca ba komunidade hamutuk nain 224
Neon Metin dadalia ho komunidade Carla Campos katak nia hakarak simu vasina atu preven-an husi virus COVID
“Hau hakara simu vasina atu bele hado’ok-an husi moras ida ne’e, momentu hau seidauk simu vasina, hau rona husi sira seluk katak se imi simu vasina, imi sei hetan moras, entaun hau mos koko fiar a’an hodi vasina, depois vasina hotu tiha, liu oras ida ga rua hanesan ne’e mos hau la sente moras, hanesa isin kole, isin manas mos la iha to’o agora”, dehan Carlas ba Neon Metin 13/05.
Iha parte sorin Bonifasio Soares hateten katak vasina ne’e importante mai ita hotu, atu bele prevene ita hotu husi moras COVID
“Ami hanesan komunidade ami tenke halo tuir buat ne’ebé mak fo sai ona husi Ministeriu Saúde katak hotu hotu tenke halo vasina, husi 18 anos sae mai leten entaun hau mos tuir regas hakarak vasina. La iha ema ida mak obriga hau, maibe ne’e hau nia hakarak duni, atu nune bele hado’ok a’an husi moras ida ne’e, tanba hanesa ami mane moras ne’e bele da’et lalais tanba ami fuma, fahe sigaru ba malu, hemu tuah hamutuk entaun moras ne’e bele da’et lalais entaun diak liu husi vasina bele preneve-an ami nia isin”, dehan Bonifasio.
Neon Metin mos halo konfirmasaun ho ekipa Centro Saude Vera Cruz, Celestina Gomes dos Reis hateten katak komunidade iha interese boot atu simu vasina
“Ami mai iha ne’e komesa horseik, komunidade sira simu ami ho di’ak, suporta ami ho aktividade ne’e. Sira barak mak iha interese hakarak simu vasina no koopera di’ak ho ami”, tenik Celestina
Celestina hatutan katak ema ne’ebe simu Vasina AstraZeneca, ema idozu hamutuk nain 8, adultu nain 216, ne’e konta hamutuk ho sira ne’ebé mak hetan moras. Total vasina iha aldeia ida ne’e iha 224 komunidade ne’ebé mak hetan ona vasina.
Xefe aldeia Constantinho da Costa hateten katak la iha obrigatoriu ba komunidade sira atu mai simu vasina no tuir ida-ida nia hakarak.
“Ami sempre halo tuir regas husi Ministeriu Saúde katak ami tenke pasa informasaun ba komunidade sira atu hotu- hotu tenke ba vasina, ami tama sai komunidade sira nia uma, hodi fo hatene ba sira atu simu vasina, maibe ami la obriga komunidade sira maibe maioria komunidade barak mak simu ona vasina”, dehan Xefe Aldeia
