Reportajen David Da Costa
Iha Selebrasaun Loron Nasional Juventude no Loron Komemorasaun Masakre Santa Crus, Prezidente da Republika (PR) Jose Ramos Horta hateten futuru nasaun ne’e iha joven nia liman, tanba me’e joven sira tenke estuda. Joven uluk luta iha 12 Novembru 1991 iha Santa Crus entrega ona mai iha jersaun 1975, ho ida ne’e futuru nasaun ne’e jerasaun 1975 sei entrega ba fali joven jerasaun foun sira.
“Ha’u nia mensajen ba joven sira, futuru ne’e iha imi nia liman. Joven sira Santa Cruz entrega ba ami jerasaun 1975, ami entrega ba imi futuru nasaun ne’e. Tanba ita joven dala ida de’it, tinan ida ita lakon, tinan ida ne’e ita la fila, ita buka estuda, bele difikuldade oi-oin, estuda nafatin no estuda liu tan,” dehan Xefe Estadu Jose Ramos Horta, bainhira partisipa iha Komemorasaun 12 Novembru ba dala-31 iha Santa Crus, 12/11.
Xefe Estadu apelu ba joven sira ne’ebé gosta tuda malu, favor para hodi buka estuda, buka servisu, para moris iha dame atu bele estuda iha dame, estuda ho seguransa atu nune’e familia, alin sira labele tauk.
Alende ne’e mós Xefe Estadu ne’e koalia tan katak ba oin tenke kontinua harii nasaun dame, pasifiku, iha dame no domin nia laran, harii nasaun ida ne’ebé moris iha demokrásia, laiha diskriminasaun ba malu.
“Ba oin saida mak ita bele halo maka tenke onra prinsipiu, sakrifisiu ne’ebé hotu-hotu halo. Ita kontinua harii nasaun dame, pasifiku, nasaun ida ne’ebé moris iha dame no domin nia laran. Tenke harii nasaun ida ne’ebé moris iha demokrásia, iha multipartidarizmu, liberdade imprensa, liberdade relijioza. Laiha diskriminasaun ba grupu, etniku ka grupu relijiozu, relijiaun sira hotu-hotu kontinua simu malu, hanesan Timor-Leste daudaun ne’e,” Horta apela.
