Reportajen Joselina Dos santos
Gabriel de Araujo nudar joven defisiensia fisiku hateten feto nia partisipasaun iha vida politika ne’e sei menus, tanba ne’e ba feto ho difisiensia no feto Timoroan sira tenke esforsu no badinas estuda hodi halo kompetisaun ho mane sira iha atividade saida deit nomós iha eleisaun Parlamentar 2023. Asaun 12 Novembru 1991 atu bele motiva feto hodi kontinua fiar-aan ba oin tanba iha nasaun demokrasia feto ho mane iha direitu hanesan.
“Tuir hau nia haree feto nia partisipasaun menus iha vida politika tanba inan aman sira mak monu liu ba lasu ne’ebe husi ema seluk nia lian entaun ida ne’e sai argumentu ida hodi fó impede ba maluk feto sira atu asesu saida deit, maibe sira la hatene katak ema idak-idak iha nia prinsipiu rasik”, dehan Gabriel de Arújo ba Neon Metin, bainhira partisipa iha komemorasaun 12 Novembru 1991 ba dala-31, iha Santa Cruz, Sabadi 12/11.
Tanba ne’e inan aman sira tenke tau importansia ba oan feto sira no apoiu ba sira mós hakarak moris diak hanesan ema seluk, katak feto no mane bele hotu tanba iha direitu hanesan hodi servi, ne’e duni tenke promove. Feto mos ema laos mane deit mak bele maibé feto no mane hamutuk mak foin ba oin.
“Ohin loron ne’ebe espesial tebes tanba ita bele ukun-an no goza demokrasia. Iha tempu loron 12 Novembru 1991 ne’e iha situasaun ne’ebe difisil tebes ba joventude loriku asuwain sira ne’ebé oferese sira a’an. Maske loron manashau husi Komoro to’o Santa Cruz ho kadeira roda maibe hau sente la dook tanba ohin loron ita bele sente ukun-an, agradese tanba ohin loron ita konsege selebra loron 12 Novembru to’o remata”, nia espresa.
Nia haktuir, sira nia mate hanesan xave ida tanba liu husi sira nia luta mak nasaun rekoñese ema ho defisiensia. Entaun difesensia iha direitu no hakilar katak livre hodi bele asesu ba saida deit, tanba iha tempu uluk ema ho kondisaun diak sira haree difisiensia ne’e sempre halo diskrimanasaun maibé agora lae.
