Reportajen Joanina Casamiro
Aliansa Maubere Nasionál (AMN) husu ba Prezidente da Republika (PR), Dr. José Ramos Horta atu uza nia kompetensia konstitusionál, hodi veta Orsamentu Jerál Estadu (OJE) 2023, se bainhira alokasaun OJE la tau iha setór estratéjiku sira, no kuandu PN nafatin integra osan ba sosa karreta fun.
Portavos Aliansa Maubere Nasionál (AMN) , Francelina Aurea Freitas de Piedade hatetne, Asaun Pasifika ne’ebé lidera josi Aliansa Maubere Nasional atu kontara Paralamentu Nasionál hodi hapara tradisaun sosa laptop no kareta luxu periodikamente, OJE kada Tinan tenke aloka makas ba setór saúde, agrikultura no edukasaun, halakon lei Pensaun Mensál Vitalísia, no halakon artigu 5 hosi lei Liberdade Reuniaun no Manifestasaun
“Ohin loron ikus hosi semana dahaat ba asaun pasifika no edukativa ne’ebé lidera hosi Aliansa Maubere Nasionál (AMN), asaun ida ne’e moris ho objetivu atu Kontra direta Parlamentu Nasionál , ne’ebé durante semana tolu konsege fokit sai karáter kantén ne’ebé nakonu ho interese privadu hosi makaer -ukun sira,” Dehan protavoz AMN, Francelina liuhosi komunikadu imprensa iha kampus Sentral UNTL, kuarta 30/11.
Nune’e mos Partidu Politiku sira [PARPOL] ne’ebé eziste durante tinan 20 ne’e, laiha interese ba povu ida. Tanba públiku bele nota liuhusi entrevista rezultadu diálogu entre deputadu sira ho AMN, no asaun pasifika ne’e mós nu’udar meiu hodi fó edukasaun politika ba povu ne’ebé konsege kria kondisaun atu povu hahú kestiona partidu sira , hahú kestiona elite politiku sira , nomós ekestiona produtu politika no lei sira mak daudaun ne’e kesi metin hela sosiedade.
Ho ida ne’e Aliansa Maubere Nasionál AMN analiza katak dinámika no dezenvolvimentu asaun durante semana tolu ne’e nato’on ona atu AMN muda forma protestu iha Parlamentu Nasionál nia oin ba kampaña iha publiku nia leet , liuhusi média sosiál sira hanesan video, diskusaun iha fatin hotu hotu no AMN sei deklara ba públiku.
“Ami husu ba Prezidente Repúblika Dr. José Ramos Horta atu uza nia kompetensia konstitusionál hodi veta OJE , kuandu alokasaun la ba iha setór estratéjiku sira no kuandu PN nafatin integra osan ba sosa karreta foun,” sira husu.
Nune’e, Kada membru AMN sei aproveita férias nasionál hodi halo kampaña programa luta ba inan – aman, jóven, no maluk sira seluk iha idea – idak nia knua, Iha tempu hanesan konvida mos inan – aman no jóven sira atu asina petisaun ne’ebé AMN sei prepara hodi halo distribui ka fahe matéria kampaña iha forma surat – tahan ka panfletu iha dalan – ninin iha fatin rame sira no eínjerál iha fatin hotu.
Aliansa Maubere Nasionál (AMN), konvida povu tomak atu uza ida – idak nia poder politika hodi halo julgamentu populár ba elite sira iha Timor – Leste, hatún ditadura – elitel harahun neo – kolonializmu.
Entertantu AMN nia ezistensia maka atu kontra Parlamentu Nasionál hodi hapara tradisaun sosa laptop no kareta luxu periodikamente, OJE kada Tinan tenke aloka makas ba setór saúde, agrikultura no edukasaun, halakon lei Pensaun Mensál Vitalísia, no halakon artigu 5 hosi lei Liberdade Reuniaun no Manifestasaun.