Reportazen David da Costa Gusmao
Resistência Nacional dos Estudantes de Timor-Leste (RENETIL), ohin loron 2 Dezembru realiza Kongresu RENETIL nian ba da-ualu, ho tema “Hametin RENETIL hodi Kontribui ba Hametin Estadu”. No liuhusi kongresu ne’e hodi hili estrutura foun RENETIL nian.
Iha kongresu RENETIL ba da-ualu ne’e partisipa husi kongresista UNAER hamutuk grupu 14 maka hanesan, Kalohan, Haksolok, Kablaki, Venceremos, Buras ba Nafatin, Gleno, 12 Novembru,Tuba Rai Metin, Lalika, Aitana, Matebian, Nicolao Lobato, Digarex no Jerasaun Foun.
Iha kongresu ne’e mós partisipa husi Prezidente Parlamentu Nasionál (PPN), Anceito Gutterres no Sekretáriu Jerál Frente Revolusionáriu Timor-Leste Independente (FRETILIN), Dr. Mari Alkatiri, Prezidente Konsellu Kombatente Libertasaun Nasionál Vidal de Jesus “Riak Leman”
Alende ne’e iha kongresu da-ualu ne’e mós sei iha seminár, no oradór sira maka hanesan Xefe Estadu Maiór Jenerál FALINTIL-FFDTL, Falur Rate Laek nia sei ko’alia kona-ba dezafiu kontemporáneu ba Valores Patriotizmu no Nasionalizmu iha prosesu Rekonstrusaun Nasionál.
Vise-Dekanu Fakuldade Direitu UNTL Julio Crispim Ximenes Belo sei Ko’alia kona-ba Sensibilidade ba lei nu’udar fatór ida hodi hametin estadu direitu Demokratiku, nomós oradór tuir tan maka Diretór Ezekutivu CEPAD joão Boavida sei Ko’alia kona-ba Diversidade Politika nu’udar dinamizadór ba Estadu direitu Demokrasia.
Nune’e iha kongresu da-ualu Resistência Nacional dos Estudantes de Timor-Leste (RENETIL) ne’e sei La’o iha loron rua, hahú husi ohin to’o loron 3 fulan Dezembru 2022.